2024 წელს თბილისში Ibis-ის ბრენდით კიდევ ერთი სასტუმრო გაიხსნება. სასტუმრო ამჯერად თბილისის საერთაშორისო აეროპორტის მიმდებარედ შენდება. სასტუმროს ასაშენებლად 12 653 კვ.მ ფართი დეველოპერულმა კომპანია Fujin Silk Properties-მა პროექტის „50 ქონება შენი სასტუმროსათვის“ ფარგლებში პირობიან ელექტრონულ აუქციონზე 1 851 000 ლარად 2018 წლის 31 მაისში იყიდა, ხოლო ნასყიდობის ხელშეკრულება ივლისში გაფორმდა.
აუქციონის პირობების მიხედვით, მიწის ახალი მფლობელი ვალდებული იყო პირადად ან მესამე პირის მეშვეობით შესაბამისი ხელშეკრულების გაფორმებიდან არაუმეტეს 48 თვის ვადაში საპრივატიზებო უძრავ ქონებაზე ან მის ნაწილზე არანაკლებ 120 ნომრის მქონე სასტუმროს შეექმნა (აშენება, ექსპლუატაციაში მიღება და ფუნქციონირების დაწყება).
საჯარო რეესტრის მონაცემების მიხედვით, შპს „ფუჯინ სილქ ფროფერთისი“ აუქციონამდე 2 დღით ადრე, 29 მაისს დარეგისტრირდა და მისი დამფუძნებელი და დირექტორი საქართველო-საფრანგეთის ორმაგი მოქალაქეობის მქონე ჯონ დიამან ტეო დოდელანდია.
როგორც „კომერსანტს“ „ფუჯინ სილქ ფროფერთისიში“ განუცხადეს, კოვიდ-პანდემიის გამო სახელმწიფოსა და კომპანიას შორის სახელშეკრულებო ვალდებულებების გადავადება მოხდა და სასტუმროს გახნა, არსებული კონტრაქტის მიხედვით 2024 წლის ივნისში მოხდება. რაც შეეხება ინვესტიციის მოცულობას, კომპანიაში კონკრეტულ ციფრს არ აკონკრეტებენ, თუმცა განმარტავენ, რომ ინვესტიციის მოცულობა სახელმწიფოს წინაშე აღებული ვალდებულებებთან მიმართებით გაცილებით მეტი იქნება. არსებული ხელშეკრულებით კომპანიას მინიმუმ 5 მლნ ლარის ინვესტიციის განხორციელება ევალება. ცვლილება შეეხო სასტუმროს ნომრების რაოდენობასაც და 120 ნომრის ნაცვლად ახლა 72 ნომრიანი სასტუმრო უნდა აშენდეს.
რა ეტაპზეა პროექტი დღეს? Fujin Silk Properties-მა სამშენებლო სამუშაოების წარმოება თბილისის საერთაშორისო აეროპორტის ტერიტორიაზე უკვე დაიწყო.
გასულ თვეში კი Fujin Silk Properties-მა Accor-თან თანამშრომლობის ხელშეკრულება გააფორმა, რომლის საფუძველზეც თბილისში საერთაშორისო ბრენდის Ibis-ის კიდევ ერთი სასტუმრო გაიხსნება.
„სიხარულით გაცნობებთ, რომ ხელი მოვაწერეთ მსოფლიოში ცნობილი ბრენდის Ibis-ის სახელით ახალი სასტუმროს მშენებლობას. სასტუმრო გაიხსნება საქართველოს ერთ-ერთ ყველაზე მნიშვნელოვან ჰაბში – თბილისის საერთაშორისო აეროპორტში, რომელიც ყოველწლიურად სამ მილიონზე მეტ ადამიანს მასპინძლობს. დარწმუნებულები ვართ, რომ აეროპორტის Ibis ტურისტებისათვის, საქმიანი მიზნით მოგზაურებისთვის თუ ტრანზიტული მგზავრებისათვის ნამდვილი აღმოჩენა გახდება.
კომფორტული ონლაინ რეგისტრაცია, მყუდრო გარემო და რაც მთავარია, მისაღები ფასები ხელსაყრელი შეთავაზებაა როგორც მოკლეხნიანი ვიზიტორებისთვის, ასევე ტრანზიტული მგზავრებისთვის“ – ამბობს Accor New East Europe-ის აღმასრულებელი დირექტორი ალექსის დელაროფი.
როგორც Accor-ში განმარტავენ, სასტუმროს ძალზედ მოხერხებული ლოკაცია სტუმრებს შესაძლებლობას მისცემს მარტივად და დაუბრკოლებლად მოხვდნენ თბილისის ცენტრალურ უბნებში, რომლის განსხვავებული და ეკლექტური არქიტექტურა ხიბლავს ვიზიტორებს.
კომპანიაშ აცხადებენ რომ სასტუმრო Ibis-ის მშენებლობაში მრავალი ჯილდოს მფლობელი ფრანგი არქიტექტორის ჩართულობა, „არტ სტუდიოს“’ ადგილობრივ გუნდთან ერთად, მყარი გარანტიაა, რომ პროექტი განსაკუთრებული ხელწერით შესრულდება.
„ეს იქნება პირველი ნაბიჯი ტერიტორიის ურბანული ტრანსფორმაციისათვის, რადგან იგი საფუძველს ჩაუყრის თბილისის აეროპორტის ტერიტორიის შემდგომ განვითარებას“, — აცხადებს კლემო ბლანშე, ფრანგი არქიტექტორი.
სასტუმროში განთავსდება 72 ნომერი და იქნება Ibis-ის ბრენდის Plaza-ს გლობალური თანამედროვე კონცეფციის შესაბამისი.
საცხოვრებლის სტილის თემატიკის ეფექტს, კიდევ უფრო გააძლიერებს ხისა და ლითონის მკვეთრი ელემენტები. თითოეულ ოთახში, სტუმრებს დახვდებათ ყველაფერი კომფორტული ვიზიტისთვის, მათ შორის: სამუშაო ადგილი, Sweet Bed საწოლი და რა თქმა უნდა, უფასო წვდომა უკაბელო ინტერნეტზე.
სასტუმროში განთავსდება თანამედროვე ბიზნეს ცენტრი, შეხვედრების ოთახები და ქართული ღვინის მაღაზია, სადაც წარმოდგენილი შერჩეული კოლექცია, საქართველოს ღვინის წარმოების მრავალწლიან ტრადიციებსა და კულტურულ მემკვიდრეობას გაუსვამს ხაზს.
„ჩვენ გვაქვს გრძელვადიანი ხედვა, თუ როგორ შევქმნათ სრულიად ახალი სამოგზაურო და გასართობი ჰაბი თბილისის საერთაშორისო აეროპორტში. Ibis იქნება პირველი ნაბიჯი უფრო დიდი და მნიშვნელოვანი გეგმებისაკენ. პროექტის შემდგომი ეტაპი მოიცავს თბილისის საერთაშორისო აეროპორტში 30 000 კვ. მ. ფართობის განაშენიანებას, რაც მიზნად ისახავს აბრეშუმის გზის მარშრუტის მნიშვნელობის დაბრუნებას.
Fujin Silk Properties-ს აღმასრულებელი დირექტორი უცხოური ინვესტიციების მუდმივი მხარდაჭერისთვის მადლობას საქართველოს მთავრობას უხდის.