კორპორაცია IBM (International Business Machines) რუსეთში თავის ბიზნესს წყვეტს და სამსახურიდან თანამშრომლებს ათავისუფლებებს. ამის შესახებ პერსონალისთვის ელ-ფოსტით დაგზავნილ წერილში არის ნათქვამი, რომელიც Reuters-მა მოიპოვა.
უკრაინაში რუსეთის შეჭრის შემდეგ IBM ასობით სხვა კომპანიას შეუერთდა და ქვეყანაში საქმაიანობა შეაჩერა. ამჯერად კომპანია რუსეთს საბოლოოდ ტოვებს.
„რადგან ომის შედეგები მატულობს და იზრდება გაურკვევლობა მისი გრძელვადიანი გავლენის შესახებ, ჩვენ მივიღეთ გადაწყვეტილება, გეგმიურად შევწყვიტოთ IBM-ის ბიზნესი რუსეთში,“ - წერს თანამშრომლებს აღმასრულებელი დირექტორი, არვინდ კრიშნა.
მან გასული თვის დასაწყისში Reuters-ს განუცხადა, რომ არ იყო დარწმუნებული, თუ რამდენ ხანს შეძლებდა კომპანია სანქციების გამწვავების ფონზე რუსი თანამშრომლებისთვის ანაზღაურების გადახდას. არვინდ კრიშნას თქმით, IBM-ს რუსეთში რამდენიმე ასეული თანამშრომელი ჰყავს.
„რუსეთში ჩვენი კოლეგები, საკუთარი ბრალეულობის გარეშე, თვეების განმავლობაში სტრესსა და გაურკვევლობას უძლებდნენ,“ - წერს კრიშნა.
აღმასრულებელი დირექტორი თანამშრომლებს არწმუნებს, რომ IBM მათ გვერდში დგომას გააგრძელებს და ყველა გონივრულ ნაბიჯს გადადგამს, რომ პერსონალისადმი მხარდაჭერა უზრუნველყოს და სამსახურიდან მათი გათავისუფლება რაც შეიძლება, მოწესრიგებულად მოხდეს.
IBM
