Tesla-ს აღმასრულებელი დირექტორი, ილონ მასკი პრეზიდენტ ჯო ბაიდენს ელექტრომობილების კომპანიის იგნორირებაში ადანაშაულებს.
მისი თქმით, პრეზიდენტი უფრო მეტ ყურადღებას ძველ ავტომწარმოებლებს, განსაკუთრემით კი GM-ს უთმობს, ხოლო თეთრი სახლის ოფიციალური პირები ღონისძიებებზე იმიტომ არ იწვევენ, რომ ეშინიათ, ისეთი რამ არ გააკეთოს ან თქვას, რაც მათ უხერხულ მდგომარეობაში ჩააგდებს.
„მათ არაფერი აქვთ სანერვიულო. მე კარგად მოვიქცევი,“ - აცხადებს მასკი.
მან ეს კომენტარი მას შემდეგ გააკეთა, რაც CNBC-მა ახალი ინფორმაცია მიწოდა, რომ ჯო ბაიდენი და თეთრ სახლი ისევ არ აპირებენ მასკის მიწვევას კორპორატიულ ლიდერებთან მომავალ შეხვედრებზე.
„ბაიდენი ყოველ ჯერზე დემონსტრაციულად აიგნორებს Tesla-ს და საზოგადოებას ატყუებს, თითქოს ელექტრომანქანების ინდუსტრიაში GM ლიდერობს, მაშინ, როცა სინამდვილეში, გასულ კვარტალში Tesla-მ 300 000-ზე მეტი ელექტრომანქანა აწარმოა, ხოლო GM-მა კი მხოლოდ 26,” - წერს მასკი ელფოსტაში.
იანვარში Tesla-მ გამოაცხადა, რომ მეოთხე კვარტალში 300 000-ზე მეტი მანქანა აწარმოა და მიაწოდა მთელ მსოფლიოს, ხოლო General Motors-ის ანგარიშის მიხედვით, კომპანიამ მეოთხე კვარტალში აშშ-ში მხოლოდ 26 ელექტრო მანქანა, მათ შორის ერთი Hummer-ის პიკაპი და 25 Bolt EV მოდელი გაყიდა.
GM-მა ცოტა ხნის წინათ გამოაცხადა, რომ Chevrolet Bolt EV-ის წარმოების შეჩერების ვადას აპრილის დასაწყისამდე გაახანგრძლივებს, თუმცა საცალო გაყიდვებს მალე განაახლებს. GM ელექტრო და ავტონომიურ მანქანებზე 2025 წლისთვის 35 მლრდ დოლარის დახარჯვას გეგმავს.
„სასაცილოა, როცა საქმე იქამდე მივიდა, რომ ადმინისტრაციაში არავის აძლევენ უფლებას, წარმოთქვას სიტყვა „Tesla“! საზოგადოების აღშფოთებამ და მედიის ზეწოლამ აიძულა იგი ეღიარებინა, რომ Tesla, ფაქტობრივად, ელექტრომობილების ინდუსტრიის ლიდერია, რასაც „შექებას“ ნამდვილად არ დავარქმევდი,“ - წერს მასკი CNBC-ისთვის გაგზავნილ ელფოსტაში.
მან პრეზიდენტ ჯო ბაიდენს არაერთხელ დასცინა. მასკმა ერთხელ ისიც განაცხადა, რომ ბაიდენს „ჯერ კიდევ სძინავს,“ რითიც „მძინარე ჯოს“ შესახებ ყოფილი პრეზიდენტის, დონალდ ტრამპის დამცინავი შეფასება გაიმეორა.
BPN.GE
ილონ მასკი
