პლანეტის უმდიდრესი ადამიანის ილონ მასკის ქონებამ Forbses-ის შეფასებით $300 მლრდ-ს გადააჭარბა. არც მასკი, არც ბეზოსი არც ბილ გეითსი და არც ვინმე სხვა ამ მომენტამდე $300 მლრდ-ს მფლობელი არ ყოფილა. მასკის კაპიტალი 2 საათში $9.8 მლრდ-ით მას შემდეგ გაიზარდა, რაც მან სიღატაკესთან ბრძოლისთვის $6 მლრდ-ის გაღების პირობა დადო.

ილონ მასკმა კვირას განაცხადა, რომ Tesla-ს აქციებს გაყიდდა და $6 მლრდ-ს გლობალური შიმშილის დამარცხებას მოახმარდა. უქმე დღეებში ბირჟებზე ვაჭრობა არ ხდება. ორშაბათს სავაჭრო სესიის გახსნიდან 2 საათში Tesla-ს აქციების ფასმა 4%-ით $1114-დან $1159-მდე მოიმატა. შესაბამისად თუ მასკის ქონება დილით $292.6 მლრდ-ს შეადგენდა, საღამოს $302.4 მლრდ-ის მფლობელი გახდა.

პლანეტის უმდიდრესი ადამიანის, ილონ მასკის ქონება, სიმდიდრით #2 ადამიანის ჯეფ ბეზოსის ქონებას $108 მლრდ-ით აღემატება, რაც თავის მხრივ საქართველოს მთლიან შიდა პროდუქტზე 6.4-ჯერ მეტია. მასკისა და ბეზოსის ქონება კი ჯამურად $0.5 ტრლნ-ს აღწევს.