მსოფლიოს უმდიდრესი მეწარმე, ილონ მასკი კომპანია Twitter-ის 44 მილიარდ დოლარად შეძენას პარასკევისთვის გეგმავს. თუმცა მანამდე მილიარდელმა Twitter-ის პროფილის აღწერა განაახლა და აღწერაში განათავსა წარწერა Chief Twit.

მასკი უკვე ეწვია სოციალური ქსელის შტაბ-ბინას. ბიზნესმენმა ვიდეოც გამოაქვეყნა, რომელშიც ის კომპანიის სათაო ოფისში ნიჟარათი ხელში შედის.

Entering Twitter HQ – let that sink in! pic.twitter.com/D68z4K2wq7

— Elon Musk (@elonmusk) October 26, 2022

ამერიკული კომპანია Twitter Inc. 2006 წელს დაარსდა. კომპანიის მთავარი პროდუქტი არის სოციალური ქსელი მოკლე შეტყობინებების გაცვლისთვის. შტაბ-ბინა მდებარეობს სან ფრანცისკოში, კალიფორნია.

მართალია, Forbes-ის მიერ მასკის ქონება 220 მილიარდ დოლარადაა შეფასებული, თუმცა მისი ქონების უდიდეს ნაწილს კომპანიები და საინვესტიციო პორტფელი წარმოადგენს. შესაბამისად, Twitter-ის შესაძენად საჭირო 44 მილიარდი დოლარი ნაღდი ფულის სახით მსოფლიოს უმდიდრეს ადამიანსაც კი არ აქვს, გამომდინარე აქედან, Twitter-ის შესაძენად საჭირო თანხის მოსაზიდად მან საინვესტიციო ბანკებსა და კერძო ფონდებს მიმართა.

13 მილიარდი დოლარი – ეს იმ თანხის მოცულობაა, რომელსაც ილონ მასკი ბანკებისგან ვალის სახით აიღებს, მათ შორის, ყველაზე დიდ მოცულობას კი მასკის რჩეული საინვესტიციო ბანკი – Morgan Stanley გასცემს, რომელსაც მილიარდერი მეწარმის ამბიციური პროექტები აქამდეც არაერთხელ დაუფინანსებია. როგორც წესი, მსგავსი მასშტაბის ტრანზაქციების სანაცვლოდ საინვესტიციო ბანკები 1-3%-იან საკომისიოს იღებენ.

ვალის მოცულობა საფინანსო ორგანიზაციების მიხედვით ასე ნაწილდება:
Morgan Stanley – $3.5 მლრდ
Bank of America – $2.7 მლრდ
Barclays – $2.7 მლრდ
MUFG – 2.7 მლრდ
BNP Paribas – $650 მლნ
Mizuho – $475 მლნ
Societe Generale – $275 მლნ

Forbes-ის ინფორმაციითვე, დარჩენილი თანხის შესაგროვებლად მასკმა კომპანია Tesla-ს აქციების გაყიდვის გადაწყვეტილება მიიღო. საერთო ჯამში, მიმდინარე წელს მასკმა საფონდო ბირჟაზე 32 მილიარდი დოლარის ღირებულების აქციები გაყიდა.

აგრეთვე აღსანიშნავია, რომ თანხის მოზიდვაში ილონს მასკს მსოფლიოს უმსხვილესი კრიპტობირჟა Binance-იც ეხმარება. კომპანიის დამფუძნებლისა და დირექტორის, ჩანგპენგ ჟაოს განცხადებით, კრიპტობირჟა მასკის გეგმას 500 მილიონი დოლარით დააფინანსებს.