ისტორიულ უბნებში K2 კოეფიციენტი არ გაიზრდება, თუმცა შესაძლოა, ინვესტორებს ავარიული სახლის გამოსყიდვის ან რეაბილიტაციის სანაცვლოდ სხვა უბნებში კოეფიციენტის გაზრდა შესთავაზონ.
„კომერსანტი“ დაინტერესდა, რამდენად მისაღებია თბილისის მთავრობის მიერ დაანონსებული ეს პროგრამა სამშენებლო სექტორისთვის.
კომპანია „არსში“ აცხადებენ, რომ მათ ისტორიულ უბნებთან ნაკლები შეხება აქვთ და ძირითადად დიდ ურბანულ განაშენიანებებს ახორციელებენ თუმცა, როგორც სექტორის წარმომადგენელი, „არსის“ გენერალური დირექტორი ბესო ორთოიძე დადებითად აფასებს პრობლემის მოგვარების მიზნით აღნიშნული პროცესების დაწყებას.
„აქ ლოგიკა არის ის, რომ ძველი თბილისი ყველაზე სპეციფიკური და სენსიტიურია და იქ ახალი არქიტექტურული მოცულობის გაჩენა არასწორია. პროექტები ცალკე კომისიას გადის და ნებისმიერი პროექტის საფუძველი ისტორიული შენობის მოცულობის შენარჩუნებაა.
დეველოპერებს და სამშენებლო კომპანიებს ურჩევნიათ, რომ ძველ თბილისში არ შევიდნენ, რადგან ეს ეკონომიკურად და ფინანსურად გამართლებული არაა იმიტომ, რომ თუ ორსართულიანი სახლი ინგრევა, ორსართულიანი სახლი უნდა ააშენო და იგივე მოსახლეობა შეასახლო და ამის ინტერესი არ აქვთ.
ეს წინადადება ინტერესის გაჩენას ემსახურება. მაგალითად, კომპანიას, რომელსაც უნდა რომ პროექტი განახორციელოს, პირობითად ვარკეთილში ან საბურთალოზე, ამ პროექტებზე დამატებით კოეფიციენტს და ინტერესს გაუჩენენ, იმ პირობით, რომ მან ძველ თბილისშიც განახორციელოს შესაბამისი პროექტი. შესაბამისად, ასე კომპანიების და დეველოპერების ინტერესს გაზრდიან, რომ ძველ თბილისშიც შევიდნენ და, რა თქმა უნდა, წესების და ისტორიული ღირებულებების გათვალისწინებით მოახდინონ ახალი დეველოპმენტი, ხოლო ფინანსური ინტერესი სხვა პროექტიდან დააბალანსონ,“ - აღნიშნა ბესო ორთოიძემ.
მერიის მიერ წარმოდგენილი წინადადება მისაღებად მიაჩნიათ „აპექს დეველოპმენტშიც“.
„თუ მშენებელი გარკვეულ თანხას დახარჯავს ისტორიული შენობის რეაბილიტაცია-გამოსყიდვისთვის, ამის ხარჯზე კი სხვა უბანში K2 კოეფიციენტის გაზრდას შესთავაზებენ და ეს ყველაფერი ციფრებში ჩაჯდება, რა თქმა უნდა, ბიზნესისთვის მისაღებია“, - აცხადებს „აპექს დეველოპმენტის“ დირექტორი ვლადიმერ რობაქიძე.
თაკო კვაჭანტირაძე