2023 წლის იანვარ-თებერვალში საქართველოში საქონლით საგარეო სავაჭრო ბრუნვამ (არადეკლარირებული ვაჭრობის გარეშე) 2 898.2 მლნ. აშშ დოლარი შეადგინა. ქვეყნის უმსხვილესი სავაჭრო პარტნიორი უკვე რამდენიმე თვეა რუსეთია (467.1 მლნ. აშშ დოლარი), რომელმაც თურქეთი (387.0 მლნ. აშშ დოლარი) ჩაანაცვლა. გარდა ამისა, საქართველოს ექსპორტის 58% დსთ-ს ქვეყნებზე მოდის, ხოლო მთავარი საექსპორტო ქვეყანა სომხეთია.
ფინანსისტი გიგა ბედინეიშვილი ამბობს, რომ გაზრდილ სავაჭრო ბრუნვა რეგიონში არსებული მოვლენების ფონზე მოსალოდნელი იყო, თუმცა პარტნიორ ქვეყნებში რუსეთის და დსთ-ს წილის ზრდა სახიფათო და არასახარბიელოა. მისი თქმით, არსებობს იმის რისკიც რომ ტვირთების რაღაც ნაწილი, არის რუსეთიდან, მესამე ქვეყნების გავლით.
„ტვირთებზე მოთხოვნა საქართველოს გავლით მკვეთრად გაზრდილია, რუსეთი როგორც სატრანზიტო დერეფანი ფაქტობრივად, ჩაკეტილია. რუსეთიდან ექსპორტზე მთელი რიგი შეზღუდვებია დაწესებული, ამიტომ, ჩვენი დერეფანი ძალიან მოთხოვნადია ახლა და ეს გამოიხატება გაზრდილ ტვირთებში. შესაბამისად გაზრდილია მაჩვენებლებიც და სტატისტიკაც სხვადასხვა მიმართულებით.
იმედი მაქვს, რომ ეს ტვირთები ძირითადად ლეგიტიმურია, თუმცა, სამწუხაროდ, ვერ გამოვრიცხავ, რომ ამ ტვირთების რაღაც ნაწილი, არის რუსეთიდან, მესამე ქვეყნების გავლით, აქ შეიძლება დსთ-ს ნებისმიერი ქვეყანა მოვიაზროთ. იმასაც ვხედავთ, რომ რუსები საქებარ სიტყვებს არ იშურებენ ჩვენი მთავრობის მისამართით.
სახიფათოა ექსპორტი რუსეთში, რადგან ნებისმიერ დროს შეიძლება გადაუტრიალდეს პუტინს თავში რაღაც და ემბარგო დაგვადოს. ინვესტიციები კი, რუსეთიდან არ მიმაჩნია უსაფრთხოების პრობლემად, პირიქით, ფულის შემოდის და ბერკეტი საქართველოს უჩნდება. არ ვგულისხმობ გამონაკლის შემთხვევებს, მაგალითად, როცა ყიდულობენ პორტს, რომ ჩაკეტონ მოძრაობა და სხვა მსგავს ვითარებას.
საგანგაშოა ევროკავშირის ქვეყნებთან ექსპორტის შემცირებაც, რაც ალბათ გამოწვეულია იმით, რომ იკლებს ჩვენი პროდუქციის კონკურენტუნარიანობა ევროკავშირის ქვეყნებში“, — ამბობს გიგა ბედინეიშვილი.
საქართველოდან რუსეთში 128 245 400 აშშ დოლარის ექსპორტი განხორციელდა. ექსპორტირებული უმსხვილესი სასაქონლო ჯგუფებია: ფეროშენადნობები, ყურძნის ნატურალური ღვინოები, მსუბუქი ავტომობილები, მინერალური და მტკნარი წყლები, სპირტიანი სასმელები. რაც შეეხება იმპორტს, რუსეთიდან 338 824.600 აშშ დოლარის იმპორტი განხორციელდა. რუსეთიდან საქართველოში ყველაზე დიდი რაოდენობით შემოვიდა ნავთობი და ნავთობპროდუქტები, ნავთობის აირები და სხვა აირისებრი ნახშირწყალბადები, ხორბალი და მესლინი, ქვანახშირი და მისგან მიღებული მყარი საწვავის სახეობები, ხორბლის ან ხორბალ-ჭვავის ფქვილი.