საქართველოს მთავრობა საფოსტო სექტორში დამატებითი რეგულაციების შემოღებას გეგმავს. ცვლილებების საბაბი რეგულაციების ევროკავშირის დირექტივებთან შესაბამისობაში მოყვანაა. კანონპროექტზე მუშაობის დასრულება 2025 წლისთვის იგეგმება.
არსებული ინფორმაციით, ახალი რეგულაციები, რომელიც ტრანსსასაზღვრო ამანათებს ეხება, ბაზრის მოთამაშეებს ახალ ვალდებულებებს უწესებს. რეფორმის ნაწილია მარეგულირებლის დანიშვნა, რომლის მიმართაც გადამზიდავ კომპანიებს კონკრეტული სტატისტიკური ინფორმაციის მიწოდების ვალდებულება ექნებათ.
სექტორის წარმომადგენლები ამბობენ, რომ ეკონომიკის უწყებას მათთან კონტაქტი არ ჰქონია, და შესაბამისად მათ კანონპროექტის ბოლო რედაქციის შესახებ ინფორმაცია არ აქვთ.
კანონპროექტის მომზადების კიდევ 2 წლით გადავადება კერძო სექტორისთვის მიუღებელია. ამ თემაზე რადიო „კომერსანტის“ გადაცემაში, „კომერსანტის დილა“ Fedex საქართველოს წარმომადგენლობის დირექტორმა ნინო მენთეშაშვილმა ისაუბრა. მისი თქმით, კანონპროექტზე მუშაობა 8 წელია მიმდინარეობს, რაც ძალიან დიდი დროა. მენთეშაშვილმა ასევე აღნიშნა, რომ დრამატული ცვლილებების მოლოდინი და გაურკვევლობა ბაზარს აზიანებს და მოთამაშეებს გარკვეულ დისკომფორტს უქმნის.
„რაც არ უნდა რთული კანონი იყოს რვა წელი კანონშემოქმედებისთვის საკმაოდ გრძელი პროცესია. ჩვენ შევეცადეთ ამ კანონში შენიშვნები შეგვეტანა და ეკონომიკის სამინისტრო ამის შესახებ ინფორმირებული გვყოლოდა და შესაბამისად ჩვენ ამ პროცესს მივყვებოდით, მაგრამ ეს არ არის იმხელა პროცესი, რომ მას რვა წელი დასჭირდეს, ამიტომ ეს ალბათ ეკონომიკური პოლიტიკის საკითხია“, - აღნიშნა ნინო მენთეშაშვილმა.
ნინო მენთეშაშვილის თქმით, კანონპროექტი საფოსტო სექტორის ორ სფეროს მიჯნავს.
„იმ რედაქციით რასაც ჩვენ ვიცნობთ, ორი სფერო ერთმანეთისგან იმიჯნება, ეს არის უნივერსალური მომსახურება და ჩვეულებრივი საფოსტო საკურიერო მომსახურება , საფოსტო საკურიერო მომსახურება რჩება ხელუხლებელი და ლიბერალიზებული ბაზარზე და უნივერსალური მომსახურეობა ექვემდებარება რეგულაციებს და შესაბამისად მას არეგულირებს სახელმწიფო,“ - აღნიშნა ნინო მენთეშაშვილმა.