IMF-ის მიერ გამოყოფილი 40 მლნ დოლარის გამოყენების საჭიროება არ დგას, — ამის შესახებ ეროვნული ბანკის პრეზიდენტმა კობა გვენეტაძემ განაცხადა.

კობა გვენეტაძემ გადაცემა „ეკონომიქსის“ ეთერში აღნიშნა, რომ საერთაშორისო სავალუტო ფონდის მიერ გამოყოფილი თანხა ამ ეტაპზე, არც ეროვნულ ბანკს სჭირდება, რომ ისესხოს დამატებითი რეზერვებისთვის, არც ფინანსთა სამინისტროს ესაჭიროება დეფიციტის დასაფინანსებლად.

„ეს პროგრამა არის ე.წ. „ბუფერული stand by“ პროგრამა, რომელიც არის ხელმისაწვდომი და გამოყოფილი თანხა გამოყენებული იქნება იმ შემთხვევაში თუ ქვეყანას ამის საჭიროება ექნება. ამ ეტაპზე ამის საჭიროება არ დგას, არც ეროვნულ ბანკს სჭირდება, რომ ისესხოს დამატებითი რეზერვები, არც ფინანსთა სამინისტროს ესაჭიროება დეფიციტის დასაფინანსებლად.

ამ მიმოხილვის დასრულება და ზოგადად ამ პროგრამის დაწყება ემსახურება იმას, რომ ჩვენ, ეკონომიკურმა ხელისუფლებამ დავდეთ გზავნილი, რომ ეკონომიკური პოლიტიკა რომელსაც ვახორციელებთ, მათ შორის რეფორმები,  ფისკალური და მონეტარული პოლიტიკა არის კარგი, საერთაშორისო სტანდარტებით კარგად შეფასებული. ზოგადად ეს არის კარგი სიახლე და დიდი იმედი მაქვს რომ ეს პროგრამა წარმატებით გაგრძელდება“, — აღნიშნა კობა გვენეტაძემ.

საერთაშორისო სავალუტო ფონდმა (IMF) საქართველოსთვის დაახლოებით 40 მილიონი აშშ დოლარი გამოყო. IMF-ის დირექტორთა საბჭომ, საქართველოს მხარდამჭერი პროგრამის (Stand-By Arrangement (SBA)) პირველი მიმოხილვა დაასრულა, სადაც აღნიშნულია, რომ რუსეთის მიერ უკრაინაში წარმართული ომით გამწვეული ნეგატიური გავლენა, საქართველოს ეკონომიკაზე, ნავარაუდევზე ნაკლები აღმოჩნდა, ტურიზმიდან შემოსავლები მზარდია, ომით გამოწვეული მიგრაციული ნაკადები და ფინანსური შემოდინებები კი მაღალია, ასევე მზარდია სატრანზიტო ვაჭრობა საქართველოს გავლით.