კახეთში ყურძნის დღიური გადამუშავება 1000 ტონას ჩამოსცდა, რაც იმაზე მიუთითებს რომ რთველი 2022 დასასრულისკენ მიდის, ამ ეტაპისთვის მცირე რაოდენობები დარჩა ახმეტისა და საგარეჯოს მუნიციპალიტეტებში, ჯამური გადამუშავება 240 000 ტონას გასცდა, აქედან 142 000 ტონა რქაწითელია, ხოლო 88 000 ტონა საფერავი.
სოფლის მეურნეობის მინისტრის მოადგილემ განაცხადა, რომ სახელმწიფო სუბსიდირების პროგრამიდან ნელ-ნელა გამოვა, თუ რას ფიქრობს სექტორი სუბსიდირების პროგრამაზე, ამის შესახებ რადიო „კომერსანტის“ გადაცემაში „კომერსანტის დილა“ ღვინის ეროვნული სააგენტოს თავმჯდომარემ ლევან მეხუზლამ ისაუბრა, მისი თქმით იმის მიღწევა, რომ სუბსიდია საჭირო აღარ იყოს ეტაპობრივად შესაძლებელია.
„ჩვენ რთველის დასრულებისთანავე ვიმუშავებთ და ვფიქრობთ, რომ წელსვე გადავწყვეტთ იმ სქემას, რაც მომავალი რთვლისთვის გვექნება, ვფიქრობთ რომ არის დრო, რომ სუბსიდიის თემაში ხარისხის კომპონენტი გაჩნდეს და ფერმერებმა ხარისხზე მეტად იზრუნონ. წელს მოსავლის შედარებით სიმცირის გამო, რთველში ნაკლები დაგვჭირდა, მათ შორის სუბსიდიისთვისაც და მათ შორის მოსავლის მართვის კომპანიასაც ნაკლების ჩაბარება მოუწია, ვფიქრობ რომ საბოლოო ჯამში ექსპორტის დივერსიფიცირებასთან ერთად მივაღწევთ იმას, რომ ყურძნის რეალიზაცია თავისუფალ ბაზარზე მოხდება.
რაც შეეხება ექსპორტს, დაახლოებით იმ რაოდენობებზე ვართ, რაზეც შარშან ვიყავით, რა თქმა უნდა ეს კარგი მაჩვენებელი არ არის, რაც ვფიქრობ რომ ამ გარემოებების გამო საკმაოდ კარგი შედეგია. წლევანდელი წელი პირველი ორი თვე ძალიან აქტიური იყო, შემდეგ მარტში განვითარებულმა მოვლენებმა და ახლაც უკრაინაში მიმდინარე ომმა ექსპორტის მაჩვენებელს დაღი დაასვა“, - აღნიშნა ლევან მეხუზლამ.
დღეის მდგომარეობით ქართული ღვინის 60% რუსეთის ბაზარზე გადის, კითხვაზე თუ რა უნდა იყოს ის ბიძგი, რაც ქართველ მეღვინეებს რუსულ ბაზარზე უარს ათქმევინებს, მეხუზლა პასუხობს, რომ შარშანდელი მონაცემების მიხედვით რუსეთში ექსპორტი მაჩვენებელი 60%- ს ჩამოსცდა და 58% შეადგინა, წელს რუსული ბაზრის წილი იმის ხარჯზე გაიზარდა, რომ დღეს ღვინის ექსპორტი უკრაინაში ფაქტობრივად არ ხდება.
„სწორედ იმის ხარჯზე, რომ ეს ნაშთები, უკრაინის და ბელარუსის ბაზრისთვის იყო განკუთვნილი რუსეთისკენ წავიდა, რაც შეეხება სხვა ბაზრებს, ჩვენ გვაქვს ქართული ღვინის პოპულარიზაციის პროგრამა და რამდენიმე ბაზარზე ძალიან აქტიურად ვმუშაობთ , ამ პროგრამის ფარგლებში, ასევე გვაქვს გარკვეული მარკეტინგული აქტივობის თანადაფინანსების კომპონენტი და ვფიქრობ, რომ საბოლოო ჯამში ეს ყველაფერი შედეგს გამოიღებს.
რაც შეეხება აშშ- ის ბაზარს, ეს ბაზარი ღვინისთვის, მათ შორის ქართული ღვინისთვის ერთ-ერთი მნიშვნელოვანი ბაზარია და თან პრემიალური ბაზარია და ბევრად ძვირს იხდიან ღვინოში, ვიდრე ჩვენ ტრადიციულ ქვეყნებში, ასე რომ ძალიან მნიშვნელოვანია და ერთ-ერთი მთავარი ამ პროგრამის ფარგლებში, სწორედ აშშ-ს ბაზარი და აქტივობები აშშ - ს ბაზარზეა.
ჩვეულებრივ ვიტყოდი, რომ აშშ- ის ბაზარზე 10-20% მდე ზრდა კარგია, მაგრამ ვფიქრობ, რომ აშშ- ში მანამ სანამ სერიოზულ რაოდენობებზეე გავალთ, კიდევ უფრო მეტი უნდა გვქონდეს პროცენტული ზრდა. აღსანიშნავია ისიც, რომ აშშ-ს ღვინის ექსპორტი შარშან მილიონ ბოთლს პირველად ასცდა“, - აღნიშნა ლევან მეხუზლამ.
თაკო კვაჭანტირაძე