მაისში რუსმა მეღვინეებმა ცქრიალა და შამპანური ღვინოების წარმოება, 2021 წლის იმავე თვესთან შედარებით, 39,3%-ით, 824 ათას დეკალიტრამდე გაზარდეს. „როსალკოგოლრეგულიროვანიეს“ და „როსსტატის“ მონაცემებს РБК ავრცელებს.
ცქრიალა ღვინოები მოიცავს ყველა ღვინოს, რომელიც ბუნებრივი დუღილის შედეგად ნახშირორჟანგით არის გაჯერებული, თუმცა ევროკავშირის ნორმების თანახმად, მხოლოდ ზოგიერთ ცქრიალა ღვინოს შეიძლება, ეწოდოს „შამპანური,“ რომელიც მხოლოდ საფრანგეთის პროვინცია შამპანში, ყურძნის გარკვეული ჯიშებიდან, „შამპენუას" მეთოდით მზადდება.
რუსეთში წარმოება თებერვლიდან მოყოლებული მუდმივად იზრდება: ამ თვეში წლიურმა ზრდამ 6%-ზე ნაკლები, 704 ათას დეკალიტრამდე, მარტში 20%, 888 ათას დეკალიტრამდე, აპრილში, თითქმის, 30%, 872 ათას დეკალიტრამდე შეადგინა. მთლიანობაში მიმდინარე წლის ხუთ თვეში შამპანურისა და ცქრიალა ღვინის წარმოება რუსეთში, თითქმის, 25%-ით გაიზარდა და 3,9 მილიონ დეკალიტრამდე შეადგინა.
შიდა წარმოება ევროპიდან ცქრიალა ღვინოების იმპორტის შემცირების ფონზე იზრდება. ევროსტატის მონაცემებით, მიმდინარე წლის იანვარ-აპრილში ევროკავშირის ქვეყნებიდან რუსეთში მსგავსი ღვინის მიწოდება ფიზიკურად 45%-ით, 6,8 ათას ტონამდე, ხოლო ღირებულებით, თითქმის, 44%-ით, 26,4 მლნ ევრომდე შემცირდა. მაისის მონაცემები ხელმისაწვდომი ჯერ არ არის.
თებერვლის ბოლოს, უკრაინაში საომარი მოქმედებების დაწყების შემდეგ, იმპორტიორებს ლოგისტიკის პრობლემები შეექმნათ. ტრანსპორტის პრობლემებმა და რუბლის მკვეთრმა კოლაფსმა თებერვლის ბოლო-მარტის დასაწყისში განაპირობა ის, რომ უმსხვილესმა იმპორტიორებმა გადაზიდვები შეაჩერეს. ამასთან, უკრაინის ომის გამო რუსეთში პროდუქციის მიწოდების შეწყვეტის შესახებ საფრანგეთში თავად შამპანურის მწარმოებლებმაც განაცხადეს. მოგვიანებით შეერთებულმა შტატებმა და ავსტრალიამ რუსეთში ღვინის პროდუქტების ყველანაირი ექსპორტი აკრძალეს, ხოლო ევროკავშირის ქვეყნებმა ფედერაციისთვის 300 ევროზე მეტი ღვინის მიწოდებაზე უარი თქვეს.