საკოორდინაციო საბჭო 31 აგვისტოს, სხვა საკითხებთან ერთად იმაზეც იმსჯელებს, აღდგება თუ არა 4 სექტემბრიდან საზოგადოებრივი ტრანსპორტის მოძრაობა. ამის შესახებ ჯანდაცვის მინისტრის მოადგილემ თამარ გაბუნიამ განაცხადა.

მისი თქმით, ქვეყანაში ეპიდემიოლოგიური კუთხით რთული ვითარებაა და კლინიკები გადატვირთულია.

,,საბჭო იმსჯელებს, შესაძლებელი იქნება თუ არა 4 სექტემბრიდან საზოგადოებრივი ტრანსპორტის მოძრაობის აღდგენა. თუმცა დღეს, ის შეზღუდვები რაც გვაქვს და დაანონსებულია, როგორც არის, ისე გაგრძელდება. საბჭო იმსჯელებს და გადაწყვეტილებას მიიღებს“, - ამბობს გაბუნია. შეგახსენებთ, რომ საკოორდინაციო საბჭოს ოპოზიციის ნაწილი მოუწოდებს, რომ გააუქმოს საზოგადოებრივ ტრანსპორტზე შეზღუდვა. როგორც ,,ლეიბორისტების“ ლიდერი შალვა ნათელაშვილი ამბობს, ტაქსებსა და პატარა ავტომობილებში გაცილებით დიდია დაინფიცირების რისკი, ვიდრე ავტობუსებსა და მეტროში. გარდა ამისა, შალვა ნათელაშვილის თქმით, უტრანსპორტობის გამო, მოსახლეობას ვაქცინაციის პუნქტებამდე მისვლა უჭირთ.

როგორც ნათელაშვილი ამბობს, ტაქსებსა და პატარა ავტომობილებში გაცილებით დიდია დაინფიცირების რისკი, ვიდრე ავტობუსებსა და მეტროში.

შალვა ნათელაშვილი კომპანიებსა და ორგანიზაციებს მოუწოდებს, გახდნენ თანამონაწილეები იმ სარჩელისა, რომლითაც ლეიბორისტებმა საქალაქო სასამართლოს მიმართეს და მუნიციპალური ტრანსპორტის აკრძალვის გაუქმება მოითხოვეს.

,,კატეგორიულად მოვითხოვ და ულტიმატუმს ვუყენებ, გააუქმონ ტრანსპორტის მოძრაობაზე აკრძალვა ყველგან. ნუ გამოკეტეთ ხალხი ბინებში და ნუ შეყარეთ პატარა ავტომობილებში, სადაც კოვიდის გავრცელებისათვის ყველა ხელსაყრელი პირობაა“, – განაცხადა შალვა ნათელაშვილმა. ცნობისთვის, საკოორდინაციო საბჭოს გადაწყვეტილებით, 14 აგვისტოდან 4 სექტემბრამდე შეიზღუდა მუნიციპალური ტრანსპორტის მოძრაობა, თუმცა შეზღუდვა საქალაქთაშორისო ტრანსპორტს არ ეხება. შეზღუდვა მოქმედებს ყველა ქალაქში, სადაც მუნიციპალური ტრანსპორტი მოძრაობს.
მარი ჩიტაია