ინდოეთის მთავრობამ განაცხადა, რომ რუსული ნავთობის იმპორტს ახორციელებს, როგორც ინფლაციის კონტროლის სტრატეგიის ნაწილი და სხვა ქვეყნებიც მსგავსს აკეთებენ. ამის შესახებ Reuters-ი წერს.
ინდოეთი მსოფლიოში ნედლი ნავთობის სიდიდით მესამე მომხმარებელი და იმპორტიორია.
რუსული ნავთობის იმპორტი ინდოეთში გაიზარდა ქვეყნის მთლიანი იმპორტის 12-13%-მდე. თებერვალში ეს იყო დაახლოებით 2%.
ინდოეთის ფინანსთა მინისტრმა ნირმალა სითარამანმა თქვა, რომ პრემიერ-მინისტრი ნარენდრა მოდი იმსახურებს შექებას სხვადასხვა ქვეყნებთან ვაჭრობისა და სხვა კავშირების დაბალანსებისთვის.
აღსანიშნავია, რომ საცალო ფასები ინდოეთში ივლისში 6,71%-ით მეტი იყო წინა წელთან შედარებით. მიუხედავად იმისა, რომ წლიური ინფლაციის მაჩვენებელი სამ თვეში შემცირდა, უკვე მეშვიდე თვეა, რაც მან გადააჭარბა ცენტრალური ბანკის დაშვებულ დიაპაზონს 2-დან 6%-მდე.
დასავლეთის ზეწოლის მიუხედავად, ინდოეთმა არ დაგმო თებერვალში რუსეთის შეჭრა უკრაინაში და მხარეებს მოუწოდებს კრიზისის დიპლომატიური გადაწყვეტისკენ. წლების განმავლობაში რუსეთი იყო ინდოეთისთვის თავდაცვითი აღჭურვილობის უდიდესი მიმწოდებელი.