სადაზღვევო ბაზარი არ იზრდება, ინერციით მივდივართ, სექტორის მოგება მიზერულია — ასე აფასებს სადაზღვევო კომპანია „გლობალ ბენეფიტს ჯორჯიას“ გენერალური დირექტორი და „ჯეო ჰოსპიტალსის“ სამეთვალყურეო საბჭოს თავმჯდომარე ნინო კობახიძე „კომერსანტთან“ სადაზღვევო სექტორის 2022 წელს.
მისი თქმით, 2023 წელს სადაზღვევო სექტორის მთავარი მოლოდინი ავტომფლობელთა სავალდებულო დაზღვევას უკავშირდება. კობახიძე იმედოვნებს, რომ სექტორი შეძლებს ყველას დარწმუნებას, რომ ავტომფლობელთა სავალდებულო დაზღვევა არ არის დამატებითი გადასახადი, არამედ ეს არის შველა მოქალაქეებისთვის, რათა მათ რისკები აირიდონ.
„პოსტკოვიდური რეჟიმია, ვცდილობთ დავბრუნდეთ იქ, სადაც კოვიდის არყოფნის შემთხვევაში ვიქნებოდით და სადაზღვევო სექტორი ამისთვის მაქსიმუმს ვაკეთებთ. სადაზღვევო ბაზარი არ იზრდება. არ არის მზარდი არც კორპორაციული ბაზარი, საცალო გაყიდვების კუთხითაც ინტერესი ძალიან დაბალია გამომდინარე იქიდან, რომ სამედიცინო დაზღვევა არ არის პოპულარული. სექტორის მილიონიანი მოგება, რაც წერია, ძირითადად კურსთა შორის სხვაობით არის ხოლმე, როგორც წესი გამოწვეული. ზოგადად სადაზღვევო სექტორის მოგება მიზერულია, ახალი კორპორაციული კლიენტები არ გვყავს.
ჩვენი კომპანიის მაგალითზე გეტყვით, რომ სერიოზული გეგმები გვაქვს, თუმცა იმ თვალსაზრისით, რომ სახელმწიფო აგვიანებს ავტომფლობელთა სავალდებულო დაზღვევის თემას, ეს რთულია. სავალდებულო დაზღვევის აქამდე არამოქმედება არ არის მისასალმებელი საკითხი და ვისურვებდი, რომ ერთხელ და სამუდამოდ შევჯერდეთ დაწყების თარიღზე და TPL ჩვენს ქვეყანაშიც არსებობდეს. ყოველ შემთხვევაში ვადები მაინც გახდეს ცნობილი და განისაზღვროს. სადაზღვევო სექტორი ისევ ძველ რეჟიმში ვართ, ინერციით მივდივართ. სხვა მხრივ, ეკონომიკის განვითარებას თუ ჩავთვლით, მცირედით შეიძლება გაიზარდოს სექტორის მაჩვენებლები.
2023 წელს აქტიური მუშაობა გვჭირდება, განსაკუთრებით ზედამხედველის მხრიდან, რომ მოხდეს ყველას დარწმუნება, რომ ავტომფლობელთა სავალდებულო დაზღვევა არ არის დამატებითი გადასახადი, არამედ ეს არის შველა მანქანის მფლობელი მოქალაქეებისთვის, რათა მათ რისკები ავარიდოთ. ამას სჭირდება ძალიან აქტიური მუშაობა, როგორც ჩანს პოლიტიკური კუთხით უყურებს ხელისუფლება უკვე მერამდენე წელია ამ პროცესს და სოციალურ გადასახადად აღიქვამს, სინამდვილეში პირიქით, უფრო თავდაცვის მექანიზმია, ვიდრე რაიმე ტიპის გადასახადი. შესაბამისად, როგორც კი გააქტიურდება სექტორი და დაიწყებს მუშაობას ამ საკითხზე, ყველაფერი ბევრად უფრო დადებითად განვითარდება და ალბათ მთავრობაც აყვება ამ ყველაფერს. მოლოდინი გვაქვს, ოპტიმისტურად ვუყურებთ სექტორის განვითარებას და ვიმედოვნებთ რომ ეს ცვლილებები მომავალი წლიდან მაინც დაიწყება“, — აღნიშნავს ნინო კობახიძე.
აღსანიშნავია, რომ 2022 წლის 9 თვის განმავლობაში მოზიდულმა სადაზღვევო პრემიამ პირდაპირი დაზღვევის საქმიანობიდან შეადგინა 704,5 მილიონი ლარი. ამავე პერიოდის შედეგებით მზღვეველების სადაზღვევო მოგებამ შეადგინა 157,2 მილიონი ლარი, წმინდა მოგებამ კი 34,9 მილიონი ლარი, რაც წინა წლის ანალოგიურ პერიოდთან შედარებით თითქმის 9.4%-ით გაზრდილია. სადაზღვევო კომპანიების აქტივების ჯამური მოცულობა შეადგენს 1 152,4 მილიონ ლარს, ხოლო კაპიტალი 341,5 მილიონ ლარს.