ინფექციური საავადმყოფოს შენობის სამშენებლო-სამონტაჟო სამუშაოებს „ანაგი“ შეასრულებს. შესაბამისი ხელშეკრულება საქართველოს მთავრობამ კომპანიასთან უკვე გააფორმა. გამარტივებული შესყიდვის ხელშეკრულების ღირებულება 24 780 000 ლარია.
შენობას სრული სარემონტო, სარეაბილიტაციო და სარეკონსტრუქციო სამუშაოები 14 თვეში უნდა დასრულდეს და ინფექციური პათოლოგიისა და შიდსის ცენტრს 13 წლის შემდეგ საკუთარი შენობა ექნება.
საავადმყოფოში არსებულ მძიმე მდგომარეობაზე „კომერსანტი“ არაერთხელ წერდა. ჩვენ გიყვებოდით, რომ წლების განმავლობაში ინფექციური პათოლოგიის, შიდსისა და კლინიკური იმუნოლოგიის სამეცნიერო პრაქტიკული ცენტრი, რომლის ბედიც სახელმწიფოს აბარია, პაციენტებს სავალალო მდგომარეობაში იღებს - შენობაში აყრილია და დაზიანებულია იატაკია, დაბზარულია და დანესტილია კედლები, არის სანიტარული პრობლემებიც. მიუხედავად იმისა, რომ პერსონალი აქციებს პერმანენტულად მართავდა, პანდემიამდე საკითხს განსაკუთრებული აქტუალობა არ შეუძენია.
არაერთი დაპირების მიუხედავად, მედიკოსები მაღალი სტანდარტების საავადმყოფოში ამ დრომდე ვერ მუშაობენ. სახელმწიფომ, სამედიცინო აპარატურა შეიძინა, მაგრამ მესაკუთრესთან უთანხმოების გამო შენობის თუნდაც კოსმეტიკური რემონტი ვერ შეძლო, უფრო მეტიც – აპარატურის ნაწილის მონტაჟიც კი ვერ მოახერხა. ახალი ინფექციური საავადმყოფოს ასაშენებლად ტენდერი რამდენიმეჯერ გამოცხადდა, თუმცა საქმე ბოლომდე ვერ მივიდა. ბოლოს, 2019 წელს საავადმყოფოს პროექტირებაზე 980 294 ლარი დაიხარჯა, მაშინ ტენდერი მუნიციპალური განვითარების ფონდმა გამოაცხადა. პროექტი ფურცლებზე დარჩა, მილიონამდე ლარი კი ბიუჯეტიდან წყალში გადაიყარა.
2020 წელს საქართველოს მთავრობამ მიიღო გადაწყვეტილება ინფექციური საავადმყოფოს ახალი შენობა საპარტნიორო ფონდის დირექტორის დავით საგანელიძის ძმის, გია საგანელიძისგან 34 მლნ ლარად იყიდოს. თუმცა, 7 წლის წინ, ლუბლიანას ქუჩაზე არსებული 12 000 კვადრატული მეტრი მიწის ნაკვეთი ირაკლი ღარიბაშვილის მთავრობამ „სამედიცინო ინოვაციების ცენტრს“ პირდაპირი მიყიდვის ფორმით სიმბოლურ ფასად, 1 მილიონად მიჰყიდა.
მიწის სიმბოლურ ფასად შეძენის სანაცვლოდ, გია საგანელიძის კომპანიას 40 თვის ვადაში მინიმუმ 25 საწოლზე გათვლილი კლინიკა უნდა აეშენებინა, არანაკლებ 4 მილიონი ლარის ინვესტიცია უნდა განეხორციელებინა და მინიმუმ 2 წლის ვადით 50 სამედიცინო მუშაკი უნდა დაესაქმებინა.
ნაკისრი ვალდებულებები „სამედიცინო ინოვაციების ცენტრმა“ არ შეასრულა. კომპანიამ დამატებითი ვადის განსაზღვრა მოითხოვა, განცხადება სახელმწიფო ქონების ეროვნულ სააგენტომ დაუდასტურა, თუმცა ვალდებულების შეუსრულებლობისათვის ვალდებულების დარღვევის დღიდან 2019 წლის 27 ივლისიდან ყოველ ვადაგადაცილებულ დღეზე 500 ლარით დააჯარიმა. დაკისრებულმა პირგასამტეხლომ ჯამში 152 250 ლარი შეადგინა.
2019 წელს უკვე მამუკა ბახტაძის პრემიერობის დროს ხელშეკრულებაში ცვლილება შედის, დავით საგანელიძის ძმა საქართველოს მთავრობამ დაკისრებული პირგასამტეხლოსგან გათავისუფლდა.
ამის შემდეგ 2020 წლის სექტემბერში სახელმწიფომ საგანელიძისგან 4 566 კვადრატული მიწის ნაკვეთი და მასზე არსებული შენობა გამოისყიდა. 7 432 კვადრატული კი ისევ „სამედიცინო ინოვაციების ცენტრის“ საკუთრებაში დარჩა.
კიდევ ერთი პრობლემა, რომელიც საავადმყოფოს უკავშირდება, გასხვისებული ტერიტორიაა. შეგახსენებთ, რომ შენობა „ავერსი ფარმამ“ 2009 წლის დეკემბერში $12.2 მლნ-დ შეიძინა. შეთანხმების მიხედვით, შენობაში კლინიკას ფუნქციონირება უსასყიდლოდ კიდევ 2 წელი უნდა გაეგრძელებინა და იმ პერიოდში სახელმწიფოს შემოსული თანხიდან ახალი საავადმყოფო უნდა აეშენებინა. 2012-2018 წლებში სახელმწიფომ ავერსს იჯარის სახით 3 მლნ ლარი გადაუხადა. 2020 წლის მაისში კი ახალ 408 ათას ლარიან იჯარის ხელშეკრულებას მოეწერა ხელი. „ავერსის“ მოთხოვნად კვლავ შენობის დაცლა რჩება.