მსოფლიოს გარშემო რამდენიმე ქვეყანა აცხადებს კორონავირუსით ინფიცირების უპრეცედენტოდ მაღალ მაჩვენებელს, ხოლო ზოგიერთი სახელმწიფო გადასინჯავს ეკონომიკურ და სოციალურ შედეგებს იმ იზოლაციის წესებისა, რომლებიც ვერ ახერხებს ვირუსის გავრცელების შეკავებას.
კვლევების თანახმად, ვირუსის ახალი ვარიანტი, "ომიკრონი" - რომელიც წარმართავს ინფიცირების ბოლო ტალღის მატებას - შესაძლოა უფრო მსუბუქ დაავადებას იწვევდეს, განსაკუთრებით აცრილ ჯგუფებში. მაგრამ ინფიცირების მაჩვენებლის მკვეთრი ზრდა აძლიერებს ზეწოლას ჯანდაცვის სისტემებზე, რომლებიც ისედაც გადატვირთულია პანდემიასთან ორწლიანი ბრძოლით, და, ამასთან, ბიზნესებს უქმნის მუშახელის ნაკლებობის საფრთხეს.
აშშ-ის დაავადებათა კონტროლის და პრევენციის ცენტრის (CDC) დირექტორმა, როშელ ვალენსკიმ 29 დეკემბერს თქვა, რომ ინფიცირების ტალღასთან შეფარდებით, სიკვდილიანობის და ჰოსპიტალიზაციის მაჩვენებელი დაბალი რჩება. უფრო ადრე, მიმდინარე კვირაში CDC-მა გაანახევრა იზოლაციის პერიოდი კორონავირუსით ასიმპტომური ინფიცირების შემთხვევებში, მიუხედავად კრიტიკისა, რომ ამან, შესაძლოა, ინფიცირების შემთხვევების ზრდა გამოიწვიოს.
ეს გადაწყვეტილება ირეკლავს ზეწოლას პრეზიდენტ ჯო ბაიდენზე, რომელიც გამოდიოდა პირობით, რომ ვირუსთან ბრძოლაში "მეცნიერების კვალდაკვალ ივლიდა" - თუმცა, ხელისუფლებაში მოსვლის შემდეგ, მას უწევს გამკლავება ინფიცირების სარეკორდო მაჩვენებლებთან, ასი ათასობით დაღუპულთან, ტესტირებაში ხარვეზებთან და მოსახლეობის ჯგუფებში ვაქცინების მიმართ უნდობლობასთან. გაპრეზიდენტებიდან ერთი წლის შემდეგ მისი მხარდაჭერის მაჩვენებელი იკლებს, ამ ფონზე ასევე არსებობს საჭიროება ბალანსი გამოინახოს ვირუსთან ბრძოლასა და ეკონომიკის და საზოგადოების ფუნქციონირებას შორის.
კორონავირუსი
