ინფლაციაზე კონტროლი ვერ გვექნება და ბოლო პერიოდშიც გამოჩნდა, რომ ინფლაცია ჩვენთვისაც მნიშვნელოვანი პრობლემაა, - აცხადებს საპენსიო სააგენტოს დირექტორი გიორგი დანელია „ინტერპრესნიუსთან“ ინტერვიუში. მისი განმარტებით, მიუხედავად არსებული გამოწვევებისა სააგენტოს საინვესტიციო მანდატი ისეა მოწყობილი, რომ არსებობს შესაძლებლობა, ინფლაციური რისკების დაზღვევა მოხდეს.
„საპენსიო დანაზოგი არის ყველაზე უფრო მეტად დაცული ქონება. ვგულისხმობთ იმას, რომ ის წარმადგენს სქემის მონაწილის პირად საკუთრებას და მასზე არ ვრცელდება არანაირი შეზღუდვა, მათ შორის არც ყადაღა, გირავნობა და ა.შ. რაც შეეხება საინვესტიციო მიმართულებით დაცულობას, ჩვენი ერთ-ერთი მთავარი მიზანია, მინიმუმ, ინფლაციას ვაჯობოთ და რეალური ამონაგები დავაგენერიროთ. ბუნებრივია, ინფლაციაზე კონტროლი ვერ გვექნება და ბოლო პერიოდშიც გამოჩნდა, რომ ინფლაცია ჩვენთვისაც მნიშვნელოვანი პრობლემაა, თუმცა ჩვენი საინვესტიციო მანდატი ისეა მოწყობილი, რომ გვაქვს შესაძლებლობა, ინფლაციური რისკები გარკვეულწილად დავაზღვიოთ. ამას ვაკეთებთ პორტფელის დივერსიფიცირებით.
ჩვენ ინვესტიცია მხოლოდ ერთ აქტივში არ გვაქვს განხორციელებული, აქტივების რამდენიმე სხვადასხვა ტიპი გვაქვს, სადაც შეიძლება დანაზოგები განვათავსოთ და რის ხარჯზეც შესაძლებელია ინფლაციური რისკების შემცირება.
კანონის მიხედვით, ჩვენ პირველი ხუთი წლის განმავლობაში უნდა ვიყოთ ნაკლებადრისკიან პორტფელში. ამ მხრივ, ქართულ რეალობაში, კანონით დაშვებული რისკისა და სარგებლის ყველაზე კარგ კომბინაციას გვაძლევს საბანკო პროდუქტები, დეპოზიტები.
შესაბამისად, რაღაც პერიოდი ჩვენი მთლიანი დანაზოგები დეპოზიტებში იყო განთავსებული. ხოლო მას შემდეგ, რაც სპეცდეპოზიტარი ავიყვანეთ, მოგვეცა საშუალება, რომ თანხა სხვადასხვა ინსტრუმენტში გადაგვენაწილებინა.
ეს ინსტრუმენტებია: უცხოური ვალუტა, ჩვენს შემთხვევაში – დოლარი, გლობალური ფასიანი ქაღალდები, სახაზინო ობლიგაციები და კორპორაციული ობლიგაციები. აქტივების თითოეულ ამ კლასს კანონის მიხედვით, განსაზღვრული აქვს ლიმიტი, რის ფარგლებშიც უნდა მოხდეს მათში ინვესტირება. მაგალითად, პორტფელის მხოლოდ 20% შეიძლება იყოს დოლარში დენომინირებული. შედეგად ვიღებთ იმას, რომ საინვესტიციო პერიოდის დასაწყისიდან დღემდე ჩვენ ვახერხებთ უფრო მეტი ამონაგები მივიღეთ ინვესტიციაზე, ვიდრე ამ პერიოდის ინფლაციაა“, - აცხადებს დანელია.
საპენსიო სააგენტო
