ინფლაციის მიხედვით, საქართველო რეგიონში მეორე ადგილზეა. წლიური ინფლაციის მაღალი დონით ქვეყნების სამეულს თუ ავიღებთ, პირველ ადგილზე თურქეთია 18,95%-ით, მეორეზე საქართველო 11,92%-ით და შემდეგ უკრაინა, სადაც ინფლაცია 9.5%-ს შეადგენს.
რაც შეეხება სხვა ქვეყნებს, ეკონიმიკურ მეცნიერებათა დოქტორ, ანალიტიკოს ნიკა შენგელიას ინფორმაციით, თანაბარი მაჩვენებლები აქვთ რუსეთს და სომხეთს, სადაც ინფლაცია 6,5%-ის ფარგლებშია. აზერბაიჯანის შემთხვევაში, 4,7%, ხოლო ყველაზე დაბალი - 3,2%-იანი ინფლაცია მოლდოვაშია.
როგორც ნიკა შენგელია აღნიშნავს, ინფლაციის ნიშნულთან დაკავშირებით სწორი გადაწყვეტილებები არ შეინიშნება, რაც ეკონომიკისთვისაც დიდი საფრთხის მატარებელია და დადებით პროცესებს ვერ გამოიწვევს.
,,ძალიან მაღალი ინფლაცია გვაქვს, მეორე ადგილზე ვართ რეგიონში. როგორც წესი, ინფლაციაზე პასუხისმგებელია ეროვნული ბანკი, მაგრამ ვერც ის, ვერ მთავრობა ამ პროცესებს რეალურად ვერ უმკლავდება. ასეა, სამწუხაროდ, ჩვენი გაანგარიშებით, ინფლაცია მაღალი იქნება 2022 წლის პირველი კვარტლის მონაცემითაც, ჯერჯერობით ასე ჩანს. ცალკე საკითხია ისიც, რომ რეალური ინფლაცია გაცილებით მაღალია, ვიდრე ამას ციფრები ცხადყოფენ. ჩვენი სტატისტიკის სამსახური შელამაზებულ მონაცემს გვაწვდის, მაგრამ ეს მხოლოდ ჩვენთან არ ხდება, წარმატებული ეკონომიკის მქონე ქვეყნებშიც შეიძლება მსგავსი მაგალითი იყოს. ინფლაციის საშუალო შეწონილი მაჩვენებლით სარგებლობენ და ხშირად ეს იწვევს ცდომილებას. არაპირველადი მოხმარების საგნებში მიმდინარე მაჩვენებლებით მაღალი ფასები მეტნაკლებად ბალანსდება“, - განმარტავს ნიკა შენგელია.
ანალიტიკოსის მოსაზრებით, ინფლაციის ყველაზე დიდი საფრთხე მაღალ საპროცენტო განაკვეთებს უკავშირდება. მისი შეფასებით, სებ-მა ყველაფერი უნდა გააკეთოს, რომ კომერციული ბანკების წლიური საპროცენტო განაკვეთები 8%-ს არ აჭარბებდეს ეროვნულ ვალუტაში, ხოლო უცხოურ ვალუტაში 4-5%-ს არ აღემატებოდეს.
შეგახსენებთ, რომ საქართველო რეგიონში მეორეა რეფინანსირების სესხის განაკვეთის მიხედვითაც. სებ-ის მიერ 4 ივლისს მიღებული გადაწყვეტილებით ეს მაჩვენებელი 10%-მდე გაიზარდა. თურქეთის შემთხვევაში, ეს მაჩვენებელი 19%-ს შეადგენს.
2021 წლის ივლისში საქართველოში, წინა თვესთან შედარებით, ინფლაციის დონემ 1,3%, ხოლო წლიურმა ინფლაციამ 11,9% შეადგინა - ფასების ზრდის ამაზე მაღალი მაჩვენებელი ბოლოს 2011 წლის მაისში დაფიქსირდა, როდესაც წლიური ინფლაცია 14,3% იყო.
საერთაშორისო სავალუტო ფონდის (IMF) პროგნოზით, საქართველოში 2021 წლის ბოლოს ინფლაციის წლიური მაჩვენებელი 9,4% იქნება, ხოლო მიმდინარე წლის ინფლაციის საშუალო დონე 7,3%-ს მიაღწევს.
მარი ჩიტაია