„რეფინანსირების განაკვეთი 11% ძალიან ბუნებრივია, როდესაც ინფლაცია 13.7%-ა. თუ ინფლაციის მოლოდინები კიდევ უფრო გაიზრდება, რისი ალბათობაც არსებობს, ვფიქრობ, მონეტარული პოლიტიკა კიდევ უფრო უნდა გამკაცრდეს“, — ამის შესახებ „კომერსანტს“ პროფესორმა, ეროვნული ბანკის საბჭოს ყოფილმა წევრმა ნიკოლოზ ყაველაშვილმა განუცხადა.
მიიღე ინფორმაცია უფრო სწრაფად „კომერსანტის“ Telegram-ზე.
ნიკოლოზ ყაველაშვილის თქმით, თუ უახლოეს თვეებში ინფლაცია არ შემცირდება, მაშინ მოსალოდნელია რომ ეროვნული ბანკი მონეტარული პოლიტიკის განაკვეთს მაისში კიდევ უფრო გაამკაცრებს.
„თუ ინფლაცია მარტში და აპრილში არ შემცირდება, რეფინანსირების განაკვეთიც შესაბამისად გაიზრდება, რადგან ეს ორი მაჩვენებელი დაახლოებით ერთ დონეზე უნდა შენარჩუნდეს. მე არ მოველი რომ მომავალ თვეებში მონეტარული პოლიტიკა შემსუბუქდება.
მონეტარული პოლიტიკის გამკაცრების შედეგად ლარში საპროცენტო განაკვეთები გაიზრდება, თუმცა არ ვფიქრობ, ამან საკრედიტო პორტფელის მოცულობაზე მნიშვნელოვანი გავლენა მოახდინოს. თუ ბიზნეს აქტივობა არ შემცირდება, სესხებზე მოთხოვნაც არ შემცირდება.
რაც შეეხება ინფლაციის მიზეზებს, ვიზიარებ სებ-ის აზრს და ვფიქრობ, რომ ის დიდწილად საგარეო ფაქტორებით არის გამოწვეული. ჯერ იყო პანდემია, შემდეგ უკრაინა-რუსეთის ომი, რაც ჩვენზე ეკონომიკური თვალსაზრისით მნიშვნელოვან ზეგავლენას ახდენს, ამიტომ ინფლაციის ზრდა ბუნებრივია“, — აღნიშნა ყაველაშვილმა.
საქართველოს ეროვნული ბანკის მონეტარული პოლიტიკის კომიტეტმა 2022 წლის 30 მარტს რეფინანსირების განაკვეთის 0.5 პპ-ით გაზრდის გადაწყვეტილება მიიღო, რის შედეგადაც მონეტარული პოლიტიკის განაკვეთმა 11.0 პროცენტი შეადგინა. მონეტარული პოლიტიკის კომიტეტის შემდეგი სხდომა 2022 წლის 11 მაისს ჩატარდება.