ბოლო მონაცემებით, საქართველოში სათამაშო ინდუსტრიის ბრუნვამ 2019 წელს 12 მლრდ. ლარს მიაღწია. პარალელურად, იზრდება ამ სექტორის წილი მთლიან ბიზნეს ბრუნვაში. ამ ფონზე კი სახელმწიფო კვლავ ვერ ახერხებს სათამაშო ბიზნესის გაკონტროლებას. დღემდე უცნობია აზარტულ თამაშებზე დამოკიდებული ადამიანების ოფიციალური სტატისტიკა.
სათამაშო ბიზნესი კი თავის წესებით თამაშობს და იმ მომხმარებლებს, რომლებსაც კომერციული ბანკების გვერდის ავლით საკუთარი ანგარიშის კონტროლი სურთ, გამოსავალს სთავაზობს. ბიზნესი გამოსავალს საკუთარ ინკოგნიტო პლასტიკურ ბარათებში ხედავს, რომელიც სამორინეებმა შექმნეს. ეს არის გზა, რომელიც კიდევ უფრო მეტ ადამიანს აქცევს ჭარბვალიანად, გაართულებს მომხმარებლების ფინანსური მდგომარეობის ანალიზს და გაზრდის საბანკო რისკებს.
„კომერსანტმა“ სათამაშო ბიზნესის მიერ შექმნილი უხილავი ბარათების თემაზე არაერთხელ მიმართა, როგორც დეპუტატებს ასევე ექპერტებს. მათგან არსებობს მოსაზრებაც, რომ ინკოგნიტო ბარათები ფულის გათეთრების ერთ-ერთი წყაროა.
თემას შეეხო „ახალი საქართველოს“ ლიდერი გიორგი ვაშაძეც. მისი თქმით თუ ეჭვი არსებობს, რომ ანონიმური ბარათების დამზადება, რომელიმე საფინანსო კომპანიის გავლით ხდება, თემა ნამდვილად შესასწავლია.“
„ქვეყანაში საფინანსო კომპანიების მარეგულირებელი ეროვნული ბანკია. ნებისმეირი ტრანზაქცია უნდა იყოს ხილული, ვინ ახდენს გადარიცხვას. აუცილებელია გაირკვეს, საიდანაც ხორციელდება ფინანსური ტრანზაქცია, იდენტიფიცირებული უნდა იყოს. თუ ინკოგნიტოდ ხდება ფულის გადარიცვები და ეს სიმართლეა, რა თქმა უნდა ამ გზით ფულის გათეთრების დიდი შანსია. როდესაც არ ხდება აღრიცხვა და ფინანსები რა წყაროდან მოდის, არ ჩანს,შეგვიძლია ვივარაუდოთ, რომ ეს არის ფინანსურ სექტორში გაჩენილი შავი ხვრელი რომლის მეშვეობითაც ყველაფრის გაკეთებაა შესაძლებელი.“-ამბობს გიორგი ვაშაძე.
მისივე თქმით, ფინანსური ტრანზაქციები ძალიან მკაცრად რეგულირებადი სფეროა. ქვეყანა ბევრ საერთაშორისო ორგანიზაციასთანაა ანგარიშვალდებული, რათა ფინანსური ტრანზაქციების მონიტორინგი ხორციელდებოდეს.
„ახალი საქართველოს“ ლიდერი გიორგი ვაშაძე ამბობს,რომ აუცილებლად უნდა ჩატარდეს მონიტორინგი, როგორც ეროვნული ბანკის მხრიდან ასევე საქართველოს ფინანსური მონიტორინგის სამსახურიდანაც.
შეგახსენებთ, რომ „კომერსანტი“ ინკოგნიტო ბარათების საკითხზე ეროვნულ ბანკსაც დავუკავშირდა. როგორც მარეგულირებელ ორგანოში განაცხადეს, მოქმედი კანონმდებლობის მიხედვით, საქართველოს ეროვნული ბანკი არ გახლავთ სათამაშო ბიზნესის ზედამხედველი ორგანიზაცია. შესაბამისად, ეროვნული ბანკი არ ფლობს ინფორმაციას აღნიშნული სფეროს ბიზნეს მოდელებისა და მათი რეგულირების წესების შესახებ. „ინფორმაციისთვის, საგადახდო ბარათების გამოშვების უფლება აქვს მხოლოდ ეროვნული ბანკის მიერ რეგულირებად სუბიექტებს (კომერციულ ბანკებს, საგადახდო მომსახურების პროვაიდერებს და მიკროსაფინანსო ორგანიზაციებს) და კანონმდებლობით არსებობს ვალდებულება, რომ საგადახდო ბარათის მფლობელი იყოს სათანადოდ იდენტიფიცირებული.”-აღნიშნეს ეროვნულ ბანკში. საკითხზე კომენტარს „კომერსანტი“ საქართველოს ფინანსური მონიტორინგის სამსახურიდანაც ელოდება.
ნათია ლომიძე