კომპანია Inn Group-ს ჯავშნების დიდი ნაწილი გაუუქმდა. როგორც კომპანიის აღმასრულებელი დირექტორი ერეკლე
კოკაია ,,კომერსანტთან“ ამბობს, 2022 წლის სეზონის გეგმები რუსეთ-უკრაინის ომმა რადიკალურად შეცვალა და ჯავშნები ყველა მიმართულებიდან შემცირდა.
,,წელს მზარდ ტენდენციას ველოდით, მაგრამ პირიქით მოხდა, ტურისტული ნაკადების დიდი კლების გამო შემოსავლები მცირდება და სერიოზულ დანაკარგს განვიცდით. ზარალი ჯერ არ დაგვითვლია, თუმცა ცხადია, რომ ამ ომმა ყველა ძალიან დაგვაზარალა. არსებული მდგომარეობით, ჯავშნები შემცირდა უფრო მეტად ევროპის მიმართულებით - პოლონეთიდან და ევროპის სხვა ქალაქებიდან 60% დაგვაკლდა. უკრაინა და რუსეთი მთლიანად გაქრა. ახლა ძირითადად არაბებსა და აზიის ქვეყნებზე გავხდით დამოკიდებული. სხვა მიმართულება ფაქტობრივად, გაჩერდა. არაბი ტურისტების რაოდენობა ბოლო პერიოდში ცოტათი გაიზარდა. თუმცა ჯამში, დიდი კლებაა. რა მოლოდინსაც ამ სეზონზე ვამყარებდით, გაქარწყლდა, მოცემულობა რადიკალურად შეიცვალა. ვიმედოვნებთ, რომ ზაფხულისკენ მდგომარეობა გამოსწორდება, მაგრამ ამის მნიშვნელოვანი პირობაა, რომ საომარი მოქმედებები დიდხანს არ გაგრძელდეს და საქართველომ როგორმე შეძლოს სტაბილურობის შენარჩუნება“, - ამბობს კოკაია ,,კომერსანტთან“.
მისი ინფორმაციით, ჯგუფში შემავალი სასტუმროებიდან ,,ბაკურიან ინნს“ ყველაზე ნაკლები დანაკარგი აქვს, ვინაიდან დამსვენებლების უმრავლესობა ისედაც ადგილობრივები არიან.
,,დანაკარგი განსაკუთრებით გუდაურს დაეტყო, სადაც ძირითად ნაწილი უცხოელი ტურისტები იყვნენ, ძირითადად უკრაინიდან და ევროპული ქვეყნებიდან, შესაბამისად, გუდაურზე ომის გავლენა ყველაზე ნეგატიურად აისახა. უნდა დაველოდოთ, არაფერი არ არის ჩვენზე დამოკიდებული. თებერვალში დატვირთულობა 85%-ის დონეზე იყო და მარტზეც იგივე იმედს ვამყარებდით, მაგრამ მოულოდნელად სხვა რეალობაში აღმოვჩნდით“, - აცხადებს ერეკლე კოკაია ,,კომერსანტთან“.
Inn Group-ის შემადგენლობაში ოთხი სასტუმრო შედის: „როიალ ინნ“, „ივერია ინნ“, „გუდაური ინნ“ და „ბაკურიანი ინნ“.
კომპანიის სასტუმროებსა და საწარმოებში ამ ეტაპზე დაახლოებით 450 ადამიანია დასაქმებული.
მარი ჩიტაია