გაზპრომბანკის ვიცე-პრეზიდენტი იგორ ვოლობუევი რუსეთიდან უკრაინაში გაემგზავრა და იქ კიევის ტერიტორიულ თავდაცვას შეუერთდა. ამის შესახებ მან The Insider-ს განუცხადა. 

მიიღე ინფორმაცია უფრო სწრაფად „კომერსანტის“ Telegram-ზე.

მისი თქმით, ის დაიბადა უკრაინის სუმის რეგიონში, ახტირკაში. ახლა იქ არიან მისი მამა, უმცროსი ძმა და მეგობრები.

„ფაქტობრივად რამდენიმე დღეში გადავწყვიტე, რომ რუსეთში ცხოვრება აღარ შემეძლო, რადგან რუსები კლავდნენ მამაჩემს, ჩემი ნაცნობებს, ახლო მეგობრებს. მამაჩემი ერთი თვე ცხოვრობდა ცივ სარდაფში. იცი რა მითხრეს ხალხმა? „აღარ გავიგოთ, რომ ახტირჩანი ხარ, უკრაინელი ხარ, არასოდეს.“ ჩავალაგე ბარგი და 2 მარტს გავფრინდი რუსეთიდან“, - ამბობს ვოლობუევი.

მან აღნიშნა, რომ მანამდე „გაზპრომბანკში“ მუშაობდა ექვს წელზე მეტი ხნის განმავლობაში, ასევე „გაზპრომის“ თანამშრომელი იყო 16 წელი, „აქედან ცხრა წელი, ფაქტობრივად, პრესსამსახურის უფროსი“.

ვოლობუევმა ​​ასევე თქვა, რომ 2004 წლიდან სურდა უკრაინაში დაბრუნება, მაგრამ ამის გაკეთება ოჯახური მიზეზების გამო ვერ შეძლო. მან უკრაინის წინააღმდეგ რუსეთის აგრესიას „ომის დანაშაული“ უწოდა.

„ეს არის დანაშაული პუტინის, რუსეთის მთავრობის და ფაქტობრივად, რუსი ხალხის მხრიდან. იმიტომ, რომ აქ პუტინი არ კლავს უკრაინელებს, პუტინი არ აუპატიურებს ქალებს, ეს რუსი ხალხია. მე კი, თუმცა ეროვნებით უკრაინელი ვარ, ამაზე პასუხისმგებლობას ვიღებ. მრცხვენია ამის, მთელი ცხოვრება ამას ვინანიებ, რადგან ორმაგი პასუხისმგებლობა მაქვს“, - განაცხადა ვოლობუევმა.

INSIDER.COM