ლავრენტი ბერიას კოჯორში მდებარე ცნობილი აგარაკის ბედი ობიექტის გასხვისებიდან ერთი წლის შემდეგაც გაურკვეველია. ინვესტორი ამ დრომდე ექსპერტიზის დასკვნას ელოდება, რომელმაც შენობა-ნაგებობების მდგრადობის ხარისხი უნდა დაადგინოს. „იბეროტელის“ დირექტორი ივანე ბარბაქაძე გვიყვება, რომ კოჯრის მდებარეობიდან გამომდინარე ტერიტორიაზე აქტიურად მუშაობა შეუძლებელი იყო. იგი კონკრეტულ ვადებს, როდის დასრულდება კვლევით ნაწილი, ვერ ასახელებს, თუმცა, აცხადებს, რომ სწორედ მდგრადობის ხარისხი გარკვევის შემდეგ გახდება ცნობილი თუ როგორ განავითარებენ რეზიდენციას, რომელიც ზუსტად 120 წლის წინ აშენდა. ივანე ბარბაქაძე ჯერჯერობით ვერც იმას ამბობს, მოხდება თუ არა არქიტექტურულად გამორჩეულ შენობა ნაგებობებისთვის ძველი, ისტორიული იერსახის შენარჩუნება.
„იქიდან გამომდინარე, რომ კვლევები არ დასრულებულა, ჯერჯერობით სიახლე არ გვაქვს. ამ დრომდე არ გვაქვს საბოლოო ინფორმაცია შენობის ამორტიზაციის ხარისხზე, თუ რა ვარგისიანობა აქვს შენობას. შესაბამისად, ინვესტორები ჯერ არ ჩამოყალიბებულან, რა ფუნქციური დანიშნულება ექნება ამ უძრავ ქონებას. პროცესს ძალიან ცუდი პერიოდი პანდემია და ზამთარი დაემთხვა. კოჯრის მდებარეობიდან გამომდინარე ის სამუშაოები, რომელიც უნდა ჩატარებულიყო, სამწუხაროდ ვერ ჩატარდა. ველოდებით ამინდების გაუმჯობესებას, რის გამოც არ გვქონია თარიღებთან დაკავშირებით კონკრეტული საუბარი. კომუნიკაცია ამ მიმართულებით ექსპერტებთან გვექნება და ყველაფერი გაირკვევა. თანხა გადახდილია, ინვესტიცია განხორციელებულია. შესაბამისად, ინვესტორების ინტერესია მალე გავერკვეთ, რა ვიყიდეთ და რისი გაკეთება შეიძლება იქ უახლოეს მომავალში.
რეალურად ახლა ვიკვლევთ, რა ვიყიდეთ. კი ვიცით, რომ მიწა და უძრავი ქონება ვიყიდეთ, მაგრამ რაც ვიყიდეთ როგორი ხარისხისაა, რა ხარისხის მდგრადობა აქვს შენობას, რათა ამის მიხედვით გადავწყვიტოთ ამ უძრავ ქონებას რა ფუნქციური დატვირთვა შევძინოთ, გავამყაროთ თუ მსგავსი შენობა ავაშენოთ. თუმცა, ამაზე მსჯელობა ჯერ ადრეა. ამას წლები არ დასჭირდება, მაგრამ დღეებიც არ იქნება საკმარისი. გავაგრძელებთ მსჯელობას და შეხვედრას რა ინტერესები შეიძლება გვქონდეს და ამ ინტერესებიდან რისი მოწყობა შეიძლება ტერიტორიაზე“, - განაცხადა ივანე ბარბაქაძემ.
შეგახსენებთ, რომ სამთავრობო კამპანიის „100 საინვესტიციო შეთავაზება ბიზნესს“ ფარგლებში სახელმწიფომ 22 560 კვ.მ. არასასოფლო-სამეურნეო დანიშნულების მიწის ნაკვეთი და მასზე განთავსებული ნაგებობები კოჯორში 2 504 000 ლარად გაასხვისა. კოჯრის მხატვრულ-არქიტექტურულად გამორჩეული აგარაკები 2021 წლის 15 აპრილს 2 504 000 ლარად შპს „იბეროტელმა“ იყიდა. 1 კვ.მ მიწის ფასი 110 ლარი გამოდის. აუქციონში მონაწილეობას 3 კომპანია იღებდა, ბიჯების რაოდენობა 434 იყო. კოჯრის გამორჩეული აგარაკის ახალ მფლობელს საინვესტიციო ვალდებულებები არ აქვს, თუმცა აუქციონის აღწერილობაში ვკითხულობთ, რომ საპრივატიზებო ობიექტზე მიმდინარეობს წარმოება კულტურული მემკვიდრეობის უძრავი ძეგლის სტატუსის მინიჭების თაობაზე. შესაბამისად, ინვესტორი ცნობილი შენობების იერსახის შეცვლას, სავარაუდოდ, ვერ შეძლებს.
შენობის საინტერესო ჩუქურთმები და ვიტრაჟული ფანჯრები ყველა გამვლელის ყურადღებას იქცევს. მას ბევრი მითი და ისტორია უკავშირდება. გავრცელებული ინფორმაციით, აგარაკი რუსეთის ბოლო მეფისნაცვლის მოღვაწეობის პერიოდშია აშენებული. ამ შენობაში 1921–24 წლებში რეპრესირებულთა დაობლებული ბავშვების თავშესაფარი იყო. გასაბჭოების შემდეგ კი კოჯორში ყველა შენობა საქალაქო სამმართველოს გადაეცა. მხატვრულ-არქიტექტურულად გამორჩეული ლურჯი შენობა, იმ დროინდელი შინაგან საქმეთა სამინისტროს და უშიშროების საბჭოს აგარაკი იყო. საბჭოთა კავშირის დაშლის შემდეგ ტერიტორიაზე ბავშვთა ბანაკი მოეწყო, მოგვიანებით კი ტერიტორია მიატოვეს და წლების განმავლობაში სახელმწიფო ბალანსზე ირიცხებოდა. შენობას ეს ეტყობა კიდეც - ჩალეწილია ფანჯრები, აყრილია იატაკი, კედლები დამწვარია, სახურავი კი ჩამოშლილია. განადგურებული შენობა ნელ-ნელა პირვანდელ იერსახისაც კარგავს. როგორ განავითარებს ახალი ინვესტორი განადგურებულ ისტორიულ შენობებს, ამას უახლოეს მომავალში გავიგებთ.
ბაჩო ადამია