2022 წლის 1-25 აპრილის პერიოდში, ახალი გაცემული იპოთეკური სესხების მოცულობის ზრდა სტაბილურია და 2021 წელთან შედარებით 44%-ს უტოლდება. გარდა ამის, 1-22 აპრილის პერიოდში, საცხოვრებელი უძრავი ქონების ტრანზაქციების რაოდენობა თბილისში 25%-ით გაიზარდა წ/წ. ამის შესახებ ინფორმაციას „თიბისი კაპიტალი“ ავრცელებს.

ორგანიზაციის ინფორმაციით, 15-21 აპრილის პერიოდში არარეზიდენტების უნაღდო ხარჯვამ, თიბისი ბანკის არხებით, 17%-ით გადააჭარბა 2019 წლის მაჩვენებელს. 1-24 აპრილის პერიოდში, მთლიანი ფულადი გზავნილების შემოდინება კი თიბისი ბანკის არხებით, 11%-ით შემცირდა წ/წ. იმავე პერიოდში, თიბისი ბანკის არხებით, ფულადი გზავნილები რუსეთიდან 20%-ით გაიზარდა 2021 წელთან შედარებით.

თიბისი ბანკის არხებით, სასტუმროებში უნაღდო ხარჯვის ზრდა შენელდა და 10%-ს გაუტოლდა 2019 წელთან შედარებით (+91% წ/წ), ხოლო რესტორნებსა და კაფეებში უნაღდო დანახარჯები 134%-ით გაიზარდა 2019 წელთან შედარებით (+173% წ/წ).

ტანსაცმელსა და აქსესუარებზე უნაღდო დანახარჯები კვლავ მნიშვნელოვნად აღემატება პანდემიამდელ მაჩვენებელს (+160%). გართობაზე უნაღდო დანახარჯები მნიშვნელოვნად გაუმჯობესდა და 2019 წლის დონეს 60%-ით გადააჭარბა, ფიტნესზე გაორმაგდა, სამშენებლო მასალებზე კი 26%-ით გაიზარდა წინა წელთან შედარებით. ავეჯსა და მოწყობილობებზე უნაღდო ხარჯვის ზრდა 43%-ს გაუტოლდა წ/წ, ელექტრონიკაზე  შესამჩნევად გაუმჯობესდა და ზრდამ 41% შეადგინა 2021 წელთან შედარებით.

პირად ჰიგიენაზე უნაღდო ხარჯვა 38%-ით გაიზარდა 2021 წელთან შედარებით, მანქანის შეკეთებაზე 45%-ით, საწვავსა და ტრანსპორტზე 41%-ს უტოლდება.

ექიმთან ვიზიტებზე უნაღდო დანახარჯების ზრდა მცირედით შენელდა და 20% შეადგინა წ/წ, ხოლო სამედიცინო აღჭურვილობაზე 27%-ით გაიზარდა 2021 წელთან შედარებით.