საქართველოს საბანკო ასოციაციის პრეზიდენტის ალექსანდრე ძნელაძის განცხადებით, ქვეყანაში იპოთეკური დაკრედიტება წლის დასაწყისიდან შემცირებულია. დაკრედიტების კლების მთავარ ფაქტორად კი სავალუტო იპოთეკის მაქსიმალური ვადის 10 წლამდე შემცირებას ასახელებს.
საბანკო ასოციაციის პრეზიდენტმა გადაცემა „საქმიან დილაში“ თქვა, რომ იპოთეკური დაკრედიტება უძრავი ქონების ერთადერთი მდგენელი არაა და წელს თავად ბაზარიც გააქტიურებულია.
„იპოთეკური სესხების აქტივობა წლის დასაწყისიდან იყო შემცირებული. აქ ორი ფაქტორი იყო, რადგანაც წლის დასაწყისიდან ამოქმედდა უცხოურ ვალუტაში 10-წლიანი ვადის შემცირება, რამაც ,მნიშვნელოვნად შეზღუდა ხელმისაწვდომობა უცხოურ ვალუტაში სესხებზე. მეორე მხარეს კი გვაქვს საკმაოდ მაღალი საპროცენტო განაკვეთი ლარში, რომელიც მიბმულია რეფინანსირების განაკვეთზე და ამ მხრივ მკვეთრ აქტივობას არ ველოდებით. მიუხედავად ამისა, უძრავი ქონების ბაზარზე აქტივობა გრძელდება, რადგანაც არ არის მხოლოდ იპოთეკურ დაკრედიტებაზე მიბმული,“ - განაცხადა ალექსანდრე ძნელაძემ.
შეგახსენებთ, რომ 2022 წლის 9 თვეში ქართულმა ბანკებმა ფიზიკურ პირებზე სულ 2.6 მილიარდი ლარის კრედიტები გასცეს, რაც წინა წელთან შედარებით 200 მილიონი ლარით ნაკლებია.