მხოლოდ 4 მარტს, საჯარო რეესტრს ახალი სუბიექტის რეგისტრაციით რუსეთის 154 მოქალაქემ უკვე მიმართა. მეწარმეთა და არასამეწარმეო იურიდიული პირების რეესტრის ვებ გვერდზე რეგისტრაციის მსურველთა ნაკადი ამ დრომდე არ წყდება. სახელმწიფო უწყებამ 154-დან 120 სარეგისტრაციო განცხადება მიიღო, ხოლო 34 განაცხადზე სარეგისტრაციო წარმოების ვადის დინება შეჩერებულია.

რომელ ბანკებში რეგისტრირდებიან რუსული კომპანიები და შეექმნება თუ არა პრობლემა ქართულ საბანკო სისტემას რუსების ასეთი რაოდენობის რეგისტრაციის გამო, ამ თემაზე „კომერსანტთან“ „საზოგადოება და ბანკების“ ხელმძღვანელმა გიორგი კეპულაძემ ისაუბრა.

„საქართველოს რუსეთის ეკონომიკაზე ყოველთვის იყო დამოკიდებული, თუმცა „ქართული ოცნების“ მმართველობის პერიოდში ეს კიდევ უფრო გაიზარდა. ვაჭრობა, ტურიზმი და ფულადი გზავნილები აქამდეც მძლავრი იყო. რაც ახლა ხდება ეს ჩვეულებრივი ამბავია რუსებისთვის, რადგან ისინი კი არ გაურბიან პუტინის რეჟიმს, არამედ ელემენტარული საყოფაცხოვრებო კუთხით შეექმნათ პრობლემა, ამიტომ ძალიან ფრთხილი მიდგომაა საჭირო. ამ პროცესში საჭიროა ეროვნული ბანკის ჩართულობაც, რადგან მან უნდა მისცეს კომერციულ ბანკებს დირექტივა, თუ როგორ მოიქცნენ ამ სიტუაციაში. მაგალითად, უკვე გვაქვს ბანკების მხრიდან გადადგმული სხვადასხვა ნაბიჯები, ზოგიერთი ამბობს, რომ გარკვეული პირობების მიხედვით გაუხსნის ანგარიშს რუსულ კომპანიას, ზოგიერთი საერთოდ არ უხსნის. ფინანსური თვალსაზრისით ეს ამ ეტაპზე დიდ გავლენას არ მოახდენს. იქნება მცდელობა, რომ რუსეთიდან ე.წ. შავი ფული ჩემოდნებით შემოვიდეს, რომელსაც აქ განათავსებენ ანგარიშებზე ან დაიწყებენ ბიზნესს. რუსეთს ტოვებენ არამარტო უცხოური კომპანიები, არამედ რუსული კომპანიებიც, რომლებიც ხვდებიან, რომ იქ ისე ვეღარ იმუშავებენ, როგორც აქამდე.

ის, რომ ჩვენ ასე დამოკიდებული ვართ რუსეთზე ფულადი გზავნილების თუ ვაჭრობის კუთხით - არის შეცდომა, რაც საშუალებას აძლევს მათ რომ ჩაერიონ შიდა პოლიტიკურ საკითხებში. რუსეთი საინქციებს იმის მიხედვით გვიწესებდა, თუ აქ ვისი გამოსვლა ან კომენტარი არ მოეწონებოდა. სრულად რომ გაუქმდეს რუსეთთან ეკონომიკური ურთიერთობა, ვერ გადაწონის იმ ფაქტს, რასაც თავისუფლება ჰქვია და სწორედ ასე უნდა იფიქროს დღეს ქართულმა ბიზნესმა“, — აღნიშნა გიორგი კეპულაძემ.

ნინო თამაზაშვილი