სიღარიბის დონე ისტორიულ მინიმუმზეა, — ამის შესახებ საქართველოს პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა.
შედარებისთვის ირაკლი ღარიბაშვილს მაგალითად 2010 წლის მაჩვენებლები მოჰყავს, რომლის მიხედვით, სიღარიბის დონე ქვეყანაში 38% იყო.
„საშუალო ხელფასის მოცულობა 15%-ით არის გაზრდილი. ამ წლებში სიღარიბის დონე ისტორიულ მინიმუმზეა ჩამოსული ბოლო წლებში და 17.5% შეადგინა. ასეთი შედეგი არ ყოფილა ბოლო წლებში. 2010 წელს 35% იყო ეს მაჩვენებელი. რა თქმა უნდა, ეს არ გვაკმაყოფილებს და მეტი უნდა ვიმუშაოთ“,- აღნიშნა ირაკლი ღარიბაშვილმა.
მისივე თქმით, ქვეყანაში ძალიან პოზიტიური დინამიკაა და უპრეცედენტო ეკონომიკური ზრდა გვაქვს.
„ასეთი ეკონომიკური ზრდა დღეს მსოფლიოში ძალიან ცოტა ქვეყანას აქვს. რა თქმა უნდა, ეს ძალიან სასიხარულოა. შარშან აპრილში თითქმის 45%-იანი ეკონომიკური ზრდა გვქონდა და ამის ფონზე არ ველოდით აპრილში ზრდას. თუმცა, 4 თვეში 10.8%-იანი ეკონომიკური ზრდა გამოგვივიდა. სავსეა ჩვენი ქალაქები ტურისტებით, იზრდება ექსპორტი, ბიზნესის ბრუნვა გაზრდილია და 38 მილიარდი ლარი შეადგინა“, — განაცხადა პრემიერმა.