ლარი გამყარებას განაგრძობს. Bloomberg-ის სავაჭრო პლატფორმაზე, 4 თებერვალს თბილისის დროით 12:00 სთ-ზე 1 აშშ დოლარის ღირებულება 2.97-ს შეადგენდა. 3.00-ზე ქვემოთ ოფიციალური კურსი ბოლოს 2020 წლის 9 ივნისს დაფიქსირდა. თუ რა განაპირობებს ლარის გამყარებას და როგორ აისახება ეს იმპორტირებული პროდუქტის ფასებზე, ამის შესახებ „კომერსანტთან“ „ისთ გეით ჯგუფის“ დამფუძნებელმა ირაკლი იაშვილმა ისაუბრა. 

მისი თქმით  ლარის გამყარება შემცირებული მოხმარებით და ტურიზმის ამოძრავებით აიხსნება.

“Რაც ახლა ხდება ამის ფუნდამენტური  ახსნა არის ის, რომ ქვეყანაში მოხმარება  აშკარად შემცირებულია, შესაბამისად გამომდინარე იქიდან, რომ ჩვენი ქვეყანა იმპორტზე ორიენტირებული ქვეყანაა და როგორც ამას მიმდინარე ანგარიშები გვეუბნება ჩვენი შიდა მოხმარების დაახლოებით 70- დან 80% - მდე  გარედან შემოგვაქვს, როდესაც ქვეყანაში მოთხოვნა იკლებს, მიწოდებაც იკლებს და ზეწოლა ლარზე, ანუ მოთხოვნა  დოლარზე  ისეთი  აღარ არის. პლუს  ამას შემოდინებები  /ტრანსფერები დიდია, ტურიზმიც მეტნაკლებად აღდგა, ამ ყველაფერს კი ლარის გამყარებაში გარკვეული წვლილი მიუძღვის. 

შემოდინება კარგია, მოხმარება შემცირებულია და მოთხოვნა დოლარზე შემცირებულია, სხვათა შორის მოთხოვნას ისიც ამცირებს, რომ ტრანსპორტირება,  განსაკუთრებით საზღვაო გადაზიდვები 5-6-ჯერ არის გაძვირებული, რის გამოც იმპორტი ფიზიკურად ვერ ხორციელდება და შესყიდვები არ ხდება. შემცირებულმა  მოთხოვნამ გამოიწვია ლარზე ნაკლები ზეწოლა და შემოვიდა დოლარი და მოთხოვნა - მიწოდება ახალ წერტილში გადაბალანსდა“, -  აღნიშნა ირაკლი იაშვილმა. 

ირაკლი იაშვილის თქმით ლარის გამყარება არ არის კარგი, რადგან ის ადგილობრივ მრეწველობას და  ექსპორტის გაზრდას ხელს არ უწყობს, მისივე თქმით ლარის გამყარება მხოლოდ იმპორტს უწყობს ხელს. 

„Მე რომ მკითხო ლარის გამყარება არ არის კარგი, იმიტომ რომ გამყარება ადგილობრივ მრეწველობას და ექსპორტის გაზრდას ხელს არ უწყობს და ამ თვალსაზრისით ეს ცუდია, ლარის გამყარება ხელს უწყობს იმპორტს, გამომდინარე იქიდან, რომ ინფლაცია მაღალია და გუშინაც მაღალი ციფრი დაფიქსირდა ამ ნაწილში შეიძლება გამყარება კარგი იყოს. 

ის ფაქტიც არ უნდა დაგვავიწყდეს, რომ  ეროვნულმა  ბანკმაც  მონეტარული პოლიტიკა  გაატარა  და ფულის  ღირებულება  გზარდა  ,  შესაბამისად ეს  კიდევ ერთი  ფაქტორია,  რამაც ფულზე მოთხოვნა გაზრდა  და  სესხები  გაძვირდა, სწორედ  ამ ფაქტების ერთობლიობამ გამოიწვია ის რაც გამოიწვია. მთავარ პრობლემად  ეროვნულ ბანკს და მთავრობას ინფლაცია მიაჩნია და შესაბამისად ძირითადი  აქცენტი  გადატანილია  ეკონომიკის  საშუალო და  გრძელვადიან  განვითარებაზე , ახლა ინფლაციის ხანძარი აქვთ ჩასაქრობი.

დღევანდელი მდგომარეობა მოთხოვნა მიწოდების ბალანსით არის განპირობებული და როგორც ჩანს რამდენიმე თვე ესე იქნება, თუმცა როგორც აღვნიშნე ადგილობრივი წარმოებისთვის და ექსპორტისთვის კარგი არ არის”, -  აღნიშნა ირაკლი იაშვილმა. 

იაშვილის თქმით ამ ეტაპზე ლარის გამყარება ინფლაციაზე დადებით გავლენას მოახდეს და იმპორტირებულ პროდუქტზე ფასებს შეამცირებს, რადგან ლარის კურის გამყარდა და ნაკლები ლარი იქნება საჭირო იგივე პროდუქტის შესაძენად.

თაკო კვაჭანტირაძე