დღეს, პარლამენტის პლენარულ სხდომაზე „საქართველოს 2022 წლის სახელმწიფო ბიუჯეტის შესახებ“ კანონის პროექტი განიხილეს და მიიღეს. ინფორმაციას პარლამენტის პრესსამსახური ავრცელებს.

ფინანსთა მინისტრის, ლაშა ხუციშვილის მიერ 2022 წლის საქართველოს სახელმწიფო ბიუჯეტის პროქტის წარდგენის შემდეგ, საპარლამენტო ტრიბუნა თანამომხსენებლის რანგში, პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძეს დაეთმო.

„2022 წლის სახელმწიფო ბიუჯეტის პროექტი პასუხობს იმ გამოწვევებს და საჭიროებებს, რაც ჩვენი ეკონომიკის და მოსახლეობის წინაშეა,“ - განაცხადა ირაკლი კოვზანაძემ.

ირაკლი კოვზანაძემ გამოწვევებად და საჭიროებებად რამდენიმე საკითხი დაასახელა: მათ შორის, პანდემიასთან ბრძოლის ღონისძიებების ფინანსური უზრუნველყოფა და მაკროეკონომიკური სტაბილურობა.

„პროექტი მოიცავს კოვიდ 19-თან დაკავშირებული ღონისძიებების დაფინანსებას, ასევე, მაღალ ხარჯებს მოსახლეობის ჯანდაცვის და სოციალური დაცვის კუთხით. გადადგმულია ნაბიჯები ბიუჯეტის დეფიციტის შემცირების კუთხით, რაც მაკროეკონომიკური სტაბილურობისთვის მნიშვნელოვანია. ვისურვებდი დეფიციტის მაჩვენებელი ჩამოცდეს 4%-ს,“ - აღნიშნა კომიტეტის თავმჯდომარემ და კიდევ ერთხელ მოუწოდა ფინანსთა სამინისტროს 2022 საბიუჯეტო წლის განმავლობაში წარმოშობილი რეზერვი მიმართონ დეფიციტის შემდგომი შემცირების მიმართულებით.

„ეს იქნება თქვენი მნიშვნელოვანი წვლილი მაკროეკონომიკური და მონეტარული სტაბილურობის საქმეში, ფასების ზრდის შეჩერების კუთხით,“ - აღნიშნა ირაკლი კოვზანაძემ.