საქართველოს პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძემ საერთაშორისო სავალუტო ფონდის ახლო აღმოსავლეთისა და ცენტრალური აზიის დეპარტამენტის უფროსის მოადგილე მერსედეს ვერა-მარტინთან და ფონდის მუდმივ წარმომადგენელთან საქართველოში სელიმ ჩაკერთან ონლაინ შეხვედრა გამართა. ინფორმაციას  საფინანსო-საბიუჯეტო კომიტეტი ავრცელებს.

სავალუტო ფონდის ინიციატივით გამართულ ონლაინ შეხვედრაზე ისაუბრეს ფონდის დირექტორთა საბჭოს მიერ მიღებულ გადაწყვეტილებაზე, რომლის მიხედვით საქართველოსთვის 400 მილიონ დოლარზე მეტი რესურსი ხდება ხელმისაწვდომი. აღნიშნული საბიუჯეტო დახმარებიდან 201.3 მლნ დოლარი დღეს გადმოირიცხა. ირაკლი კოვზანაძემ მადლობა გადაუხადა მერსედეს ვერა-მარტინს ქვეყნისთვის გაწეული დახმარებისთვის. თავის მხრივ, სავალუტო ფონდის მაღალჩინოსანმა აღნიშნა, რომ გაფართოებული დაფინანსების მექანიზმით მხარდაჭერილი სამწლიანი პროგრამის ფარგლებში საქართველო პირველი ქვეყანაა, რომელიც სავალუტო ფონდისგან სოლიდურ ფინანსურ დახმარებას იღებს. მერსედეს ვერა-მარტინის თქმით, თანხა ეკონომიკის მხარდაჭერის პროგრამების და ჯანდაცვის სისტემის საჭიროებების დაფინანსებას მოხმარდება.

ონლაინ შეხვედრაზე, რომელიც ერთ საათზე მეტხანს გაგრძელდა, ყურადღება გამახვილდა ქვეყნის მაკროეკონომიკური და ფასების სტაბილურობის საკითხებზე, ასევე სახელმწიფო ბიუჯეტში მოსალოდნელ ცვლილებებზე. საუბარი შეეხო საფინანსო სექტორის მდგრადობის საკითხებს, მათ შორის საბანკო სექტორში არსებულ მდგომარეობას.

გარდა ამისა, სავალუტო ფონდის წარმომადგენლები დაინტერესდნენ თუ როგორ მუშაობს პარლამენტი საგანგებო მდგომარეობის დროს. ირაკლი კოვზანაძემ მათ მიაწოდა ინფორმაცია გარკვეული კანონპროექტების შესახებ, რომლებიც შემოსულია პარლამენტში. კერძოდ, „სახელმწიფო პენსიების შესახებ“ კანონში ცვლილებები, რომელიც პენსიების ინდექსაციას გულისხმობს. ასევე ისაუბრეს გაკოტრების შესახებ კანონპროექტზეც.

როგორც საფინანსო-საბიუჯეტო კომიტეტის თავჯდომარემ აღნიშნა, ყველა აუცილებელი კანონპროექტი დროულად იქნება მიღებული
„პანდემიამ ბუნებრივია, გავლენა იქონია პარლამენტის საქმიანობაზე, აპარატის თანამშრომლები დისტანციურად სახლიდან მუშაობენ, ამის მიუხედავად, ყველა აუცილებელი კანონპროექტი დროულად იქნება მიღებული “-განაცხადა ირაკლი კოვზანაძემ და ხაზგასმით აღნიშნა, სავალუტო ფონდის და სხვა საერთაშორისო საფინანსო ინსტიტუტების აქტიური ჩართულობის განსაკუთრებული მნიშვნელობა საქართველოს საფინანსო და ეკონომიკის სხვადასხვა სექტორში.