ავიაბილეთებზე ფასების შემცირება რეგიონში და ზოგადად მსოფლიოში არსებული ვითარების დასტაბილურებაზეა დამოკიდებული. როგორც რადიო „კომერსანტის“ ეთერში გადაცემა „კომერსანტის დილა“-ში საქართველოს აეროპორტების გაერთიანების დირექტორმა ირაკლი ქარქაშაძემ აღნიშნა, ავიაბილეთების გაიაფების მოლოდინი არსებობს.

„კითხვაზე უნდა ველოდოთ თუ არა ავიაბილეთებზე ფასების ცვლილებებს, ალბათ უნდა ველოდოთ. იქიდან გამომდინარე, რომ ის,  რაც დღეს საავიაციო ბაზარზე ხდება, ეს არ არის სტანდარტული მოვლენა, ეს არის ფორს მაჟორიდან და არსებული გართულებული ვითარებიდან გამოწვეული და შესაბამისად, როგორც კი დასტაბილურდება რეგიონში ვითარება და ზოგადად მსოფლიოში, ანალოგიურად დასტაბილურდება ფასებიც“, - აღნიშნა ირაკლი ქარქაშაძემ.

როგორც აეროპორტების გაერთიანების ხელმძღვანელი ამბობს, დღეს ბილეთის ფასს უმეტესწილად განსაზღვრავს საავიაციო ნავთი, რომელიც საკმაოდ გაძვირებულია, ხოლო აეროპორტების მოსაკრებლის წილი მთლიან ბილეთში 25%-მდეა.

„რაც შეეხება ფასებს, მნიშვნელოვანია ჩავშალოთ, თუ როგორ ახდენენ ავიაკომპანიები თავიანთი ფასების გენერირებას. აქ ძირითადი კომპონენტი და ფასის ძირითადი წარმომქმნელი არის საავიაციო საწვავი, რომლის ფასიც მსოფლიოში პანდემიის და შემდეგ რუსეთ-უკრაინის ომის ფონზე გაზრდილია. ამას ემატება ასევე ის ფაქტიც, რომ უკრაინაში საჰაერო სივრცე დაკეტილია და ძალიან ბევრ ავიაკომპანიას დიდი მარშრუტით უწევს ფრენა და შესაბამისად უფრო მეტი დანახარჯი აქვს კომპანიას საწვავის კუთხით. ეს კი ფასებზე დიდ გავლენას ახდენს.

რაც შეეხება აეროპორტის მოსაკრებლებს, ეს თემა როგორც საქართველოს აეროპორტებისთვის, ასევე ზოგადად სხვა აეროპორტებისთვის მსოფლიოში მერყეობს 15-დან 25%-მდე, ბილეთის საერთო ღირებულებაში. ჩვენ ხშირად გვსმენია, რომ აეროპორტი არის ძვირი და ამიტომაცაა ბილეთის ფასი მაღალი. ზოგადად დაბალბიუჯეტიანი ავიაკომპანიები სენსიტიურები არიან ფასების მიმართ, მაგრამ ეს არაა ის კომპონენტი, რომელიც გადამწყვეტია ავიაბილეთის ფასის დადგენისას“, - განაცხადა ირაკლი ქარქაშაძემ.