ირანი ადასტურებს, რომ ცენტრიფუგები გადაიტანა ნათანზის მიწისქვეშა ბირთვულ ობიექტზე - რამდენიმე დღეში მას შემდეგ, რაც გაეროს ატომურმა სააგენტომ განაცხადა, რომ თეირანის თხოვნით აამუშავებს სადამკვირვებლო კამერებს ცენტრიფუგების ამ ახალი ადგილის მონიტორინგის მიზნით.
ცენტრიფუგები მოხსნილ იქნა ირანის ამჟამად დახურული კარაჯის ბირთვული ობიექტიდან, და ისინი გამოყენებული იქნება იმ ნაწილებისთვის, რომლებიც განაპირობებს ცენტრიფუგების ძალიან მაღალი სიჩქარით ბრუნვას, ურანის გაზის გამდიდრების მიზნით. ეს აღძრავს კითხვებს ირანის გეგმებზე მაღალტექნოლოგიური ცენტრიფუგების დამზადების თაობაზე. ირანის სახელმწიფო მედია ავრცელებს ქვეყნის ატომური ენერგიის ორგანიზაციის პრესმდივნის, ბეჰრუზ კამალვანდის სიტყვებს - რომ მთავრობამ სამუშაო ოპერაცია უსაფრთხოებასთან დაკავშირებული მოსაზრებებით გადაიტანა ახალ ადგილას. კარაჯის ცენტრიფუგების ობიექტი ივნისში გახდა ირანის განცხადებით საბოტაჟის სამიზნე. საბოტაჟის შეტევის სამიზნე ორჯერ გახდა ნათანზის ობიექტიც, რაშიც ირანი ისრაელს ადანაშაულებს. არსებობს შეშფოთება, რომ ირანი, შესაძლოა, ახლოს იყოს ატომური იარაღის შექმნასთან, თუკი ამის გაკეთებას გადაწყვეტს.
ირანი ამჟამად ურანის გამდიდრების ოპერაციას აწარმოებს ასობით მაღალტექნოლოგიური ცენტრიფუგით - ზოგი მათგანი ამდიდრებს 60 პროცენტით, რაც ახლოსაა იარაღისთვის საჭირო მაჩვენებელთან, 90 პროცენტთან.
წყარო: "რადიო თავიუსფლება"