ირანი იმ ქალების საბანკო ანგარიშებს გაყინავს, რომლებიც ჰიჯაბის ტარებაზე უარს ამბობენ. ირანის ეს ინიციატივა, ნაღდ ფულთან და ციფრულ ვალუტასთან ერთად, დეცენტრალიზებული ვალუტების არსებობის აუცილებლობას აძლიერებს, წერს Cointelegraph-ი.

ირანის პარლამენტის წევრმა ადგილობრივ მედიას განუცხადა, რომ მთავრობა გეგმავს ახალი სასჯელის დაწესებას იმ ქალებისთვის, რომლებიც საჯაროდ ჰიჯაბს არ ატარებენ. იმ პირებს, რომლებიც უარს იტყვიან ამ ბრძანების შესრულებაზე, ორი გაფრთხილების შემდეგ, შესაძლოა საბანკო ანგარიშები გაუყინონ.

ისლამური საკონსულტაციო ასამბლეის კულტურული კომისიის წევრმა ჰოსეინ ჯალალიმ 6 დეკემბერს ირანულ მედიას განუცხადა, რომ ქალებს SMS-ს გაუგზავნიან და კანონის პატივისცემისკენ მოუწოდებენ. თუ გაფრთხილების შემდეგ მათ სურვილს თუ არ დაემორჩილებიან, საბანკო ანგარიშები გაეყინებათ.

აღსანიშნავია, რომ ირანი 9 აგვისტოდან საერთაშორისო სავაჭრო გარიგებებში კრიპტოვალუტას იყენებს და საკუთარ ციფრულ ვალუტას ავითარებს, რომელსაც კრიპტო რიალი ეწოდება.

შეგახსენებთ, რომ ირანში საპროტესტო აქციები მას შემდეგ იმართება, რაც ირანელი ქალი, სახელად მაჰსა ამინი, მორალის პოლიციამ ჰიჯაბის არტარების გამო დააკავა. 20 წლის მაჰსა ამინი საეჭვო ვითარებაში თეირანის საავადმყოფოში გარდაიცვალა. ამის შემდეგ ქალებმა პროტესტის ნიშნად ჰიჯაბის ტარებაზე უარის თქმა დაიწყეს.