გეოპოლიტიკური პირობებიდან გამომდინარე, კასპიის ზღვის მარშრუტით, აზერბაიჯანი - საქართველო-შავი ზღვის ან თურქეთის გავლით ევროპისკენ და უკან ტვირთების მოცულობა იზრდება, რაც სატრანსპორტო ნაკადების დივერსიფიკაციისთვის მნიშვნელოვანია. ამის შესახებ TRACECA-ს სამთავრობათაშორისო კომისიის გენერალურმა მდივანმა, ასეტ ასავბაევმა ირანის გზებისა და ურბანული განვითარების მინისტრ როსტამ ღასემთან შეხვედრის დროს განაცხადა, რასაც სააგენტო Trend-ი ავრცელებს.
შეხვედრაზე TRACECA-ს წევრ ქვეყნებთან ირანის სავაჭრო და ეკონომიკური ურთიერთობები, პერსპექტივები, ასევე, ირანის სატრანსპორტო და სატრანზიტო პოტენციალი, უსაფრთხო და უწყვეტი სატრანზიტო გზების გამოყენების საკითხი განიხილეს.
ასეტ ასავბაევმა ხაზგასმით აღნიშნა, რომ ივნისიდან თურქმენეთმა ქვეყანაში უცხოური სატრანზიტო მანქანების შეშვება დაიწყო, რის შემდეგაც TRACECA გადამზიდველებს უზბეკეთი-თურქმენეთი-ირანი-თურქეთის მარშრუტზე მგზავრობის პირობებს აცნობს. ასევე, ორგანიზაციაში განიხილავენ იმ შესაძლებლობებს, რაც ირანს ამ მარშრუტზე ტრანზიტის განვითარებისთვის აქვს.
თავის მხრივ, როსტამ ღასემი აცხადებს, რომ ირანი, რეგიონის ქვეყნებთან ერთად, მზად არის ტრანზიტის მოცულობა გაზარდოს და ტარიფები დაარეგულიროს, ასევე, ტრანსპორტის სფეროში რეგიონული თანამშრომლობა გააფართოვოს.
„TRACECA-ს წევრ ქვეყნებს აქვთ განსაკუთრებული შესაძლებლობები, თითოეულ მათგანს აქვს თავისი მახასიათებლები და გეოპოლიტიკა. როგორც საზღვაო, ისე სახმელეთო რეგიონული გადაზიდვები ურთიერთქმედებით არის შესაძლებელი. ირანს, როგორც TRACECA-ს წევრ ქვეყანას, აქვს ჩრდილოეთ-სამხრეთის და აღმოსავლეთ-დასავლეთის დერეფნებში, ასევე, საზღვაო სექტორში - მაზანდარანისა და ქვეყნის სამხრეთ წყლებში საკუთარი მახასიათებლები,“ - აცხადებს მინისტრი.
ამასთან, მხარეებმა TRACECA-ს მრავალმხრივი სანებართვო სისტემაში ირანის მიერთების შესაძლებლობა განიხილეს, რაც საგუშაგოების მუშაობის შეფასებას, „ცხელი ხაზის“ კონცეფციის გამოყენებასა და რიგ სხვა საკითხებს მოიცავს.
დიჯიტალიზაციის მხრივ, TRACECA მზად არის, ქვეყნებს, მათ შორის ირანს, საერთაშორისო ტრანსპორტირებაში eTIR-ისა და eCMR-ის სისტემების დანერგვასა და გამოყენებაში, ასევე ციფრული ეკოსისტემის შექმნაში დაეხმაროს.
TRACECA-ს გენერალურმა მდივანმა კასპიის ზღვაში ირანის უდიდესი ნავთობჩასატვირთი პორტი, ნეკა მოინახულა. ამასთან, ის ამირაბადის პორტის ინფრასტრუქტურას გაეცნო და მშენებარე სარკინიგზო-საბორნე ნავმისადგომი, ასევე, მეტეოროლოგიური ცენტრი დაათვალიერა.