საარბიტრაჟო დავები სასურველი არაა და ჯობია, როდესაც ინვესტორი შემოსულია ისეთ საინვესტიციო გარემოში, სადაც ყველაფერი გარკვეულია. ის სატარიფო მეთოდოლოგია, რაც დღეს გვაქვს, არის გარანტია ინვესტორებისთვის, რომ ინვესტიციებს ახორციელებენ სექტორში, სადაც თამაშის გამჭვირვალე წესებია, - ასე გამოეხმაურა სემეკის ყოფილი თავმჯდომარე და ენერგეტიკული ბირჟის ხელმძღვანელი ირინა მილორავა საერთაშორისო არბიტრაჟში საქართველოს მთავრობის მიერ რუსულ ენერგეტიკულ კომპანია „Интер РАО“-სთან დავის წაგებას.
როგორც ირინა მილორავამ BMG TV-ს ეთერში სტუმრობისას განაცხადა, დავა არ ყოფილა იმაზე, თუ რატომ შემცირდა სამომხმარებლო ტარიფები 2013 წელს, არამედ დავა დაიწყო, როდესაც 2015 წელს მარეგულირებელმა კომისიამ გაზარდა ტარიფები.
„და თუ გახსოვთ 2015 წელს იყო ძალიან მნიშვნელოვანი ზრდა 40%-ით, „ინტერ რაო“ ითხოვდა უფრო მეტად ზრდას - ამაზე იყო დავა.
2014 წელს ძალიან მნიშვნელოვანი გადაწყვეტილება იყო მიღებული ქვეყნის მიერ ისეთ კომპანიებთან, რომლებიც ექვემდებარებიან სატარიფო რეგულირებას, არიან ბუნებრივი მონოპოლიები, მემორანდუმის ნაცვლად ტარიფის დათვლა დაიწყო სატარიფო მეთოდოლოგიის საფუძველზე. ეს იყო ძალიან მნიშვნელოვანი გადაწყვეტილება. იქიდან მოყოლებული ყველა ქსელურ კომპანიას ტარიფი უდგინდება სატარიფო მეთოდოლოგიის საფუძველზე. ამიტომ ვთვლი, რომ ის გადაწყვეტილება, რომელიც მაშინ მარეგულირებელმა კომისიამ მიიღო, იყო ძალიან სწორი გადაწყვეტილება,“ - აღნიშნა მილორავამ.
მისი თქმით, ის მხარეებს შორის გაფორმებული მემორანდუმის დეტალებს არ იცნობს.
„არ ვიცნობ მემორანდუმს, არ ვიცნობ არბიტრაჟის გადაწყვეტილებას, ფაქტია, რომ როდესაც ტარიფი დგინდებოდა დაახლოებით მოთხოვნა იყო 200 მლნ-ზე მეტი, თუ სწორად მახსოვს და შედეგი დადგა ის, რაც დადგა. კიდევ ერთხელ ვიმეორებ, რომ მთავარი ბუნებრივ მონოპოლიებთან მიმართებაში არის ის, რომ ტარიფი დგინდებოდა სატარიფო მეთოდოლოგიის შესაბამისად. ეს არის საუკეთესო პრაქტიკა. მემორანდუმების პრაქტიკა რაღაც ეტაპზე შესაძლოა გამართლებული იყოს, იმიტომ, რომ ქვეყანაში არ არის საკმარისი საინვესტიციო ბაზა, მაგრამ როდესაც ჩვენ წლები ვმუშაობდით ამ სატარიფო მეთოდოლოგიაზე, საქმეში იყო ჩართული უამრავი საერთაშორისო ექსპერტი, ეს შეფასდა, როგორც ერთ-ერთი კარგი მეთოდოლოგია, არამარტო რეგიონის, არამედ მთლიანად ევროპის მასშტაბით. რა თქმა უნდა, ამოცანა იყო, რომ ყველა ბუნებრივი მონოპოლია გადასულიყო სატარიფო დაგეგმარებაზე. უფრო მეტსაც გეტყვით, ელექტროენერგეტიკული საწარმოების კვალდაკვალ, ბუნებრივი გაზის სექტორიც გადავიდა სატარიფო მეთოდოლოგიაზე და დღეს ყველა ტარიფი რაც ითვლება ელექტროენერგეტიკულ სექტორში, ითვლება ზუსტად ამ მეთოდოლოგიის საფუძველზე“, - აღნიშნა მილორავამ.