მომდევნო წლებში რთველის სუბსიდირების პროგრამიდან გამოვალთ, - ამის შესახებ ფინანსთა მინისტრის მოადგილემ, გიორგი კაკაურიძემ ჯანმრთელობის დაცვისა და სოციალურ საკითხთა კომიტეტის სხდომაზე განაცხადა. მისივე თქმით, იმ პირობებში, როდესაც პანდემიის შემდეგ ღვინოზე მოთხოვნა აღდგენილი არ იყო, აღნიშნული ჩარევა საჭირო არ გამხდარა.

“გეთანხმებით, რომ გრძელვადიანად რთველის სუბსიდირება არ არის სწორი პროგრამა. ჩვენ ერთხელ გამოვედით ამ პროგრამიდან, მაგრამ პანდემიის გამო უკან შესვლა მოგვიწია. გიდასტურებთ, რომ მომდევნო წლებში გამოვალთ ამ პროგრამიდან. ამას უფრო სოციალური ეფექტი აქვს. იცით, რომ კახეთში მოსახლეობის დიდი ნაწილი სწორედ რთველზეა დამოკიდებული. იმ პირობებში, როდესაც აღდგენილი არ არის ღვინოზე მოთხოვნა პანდემიის შემდეგ , ეს ჩარევა საჭირო და აუცილებელი იყო“, - აღნიშნავს კაკაურიძე.

მინისტრის მოადგილის ეს განცხადება „კომერსანტთან“ „თელავის ღვინის მარნის“ დამფუძნებელმა ზურაბ რამაზაშვილმა და დარგის სპეციალისტმა გიორგი სამანიშვილმა შეაფასეს.  როგორც რამაზაშვილი აღნიშნავს, სუბსიდირების პროგრამა სტრატეგიულად მნიშვნელოვანი დარგებისთვის მნიშვნელოვანია.

„ამაზე რაღაც ცალმხრივი დამოკიდებულება არ  მაქვს. მე  ვფიქრობ, რომ ისეთი დარგების მხარდაჭერა, რომლებსაც ქვეყნისთვის სტრატეგიული მნიშვნელობა აქვს მნიშვნელოვანია. მაგრამ თუ სახელმწიფო ხედავს, რომ ეს დარგი უკვე თვითკმარია და მას შეუძლია თვითონ არეგულიროს  საკუთარი თავი, იმდენად  ეფექტურად რომ  კომუნიკაციის  ყველა მონაწილე მხარე კმაყოფილი იყოს, სახელმწიფოს მაშინ შეუძლია თქვას, რომ მე ჩემი მისია  შევასრულე და ახლა გამოსვლაა საჭირო.

რაც მე მახსოვს, უმეტეს წილად  სახელმწიფოს მხარდაჭერა იყო მევენახეების და  ღვინის საწარმოების მიმართ და თუ ახლა ის დრო მოვიდა, როდესაც ასე ჩანს, შესაძლოა ეს სწორიც არის, პრაქტიკა  გვაჩვენებს. წინასწარ ვერ ვიტყვი  იმას კარგი იქნება  თუ  ცუდი, მაგრამ  მთელი ის პერიოდი, როდესაც  სახელმწიფოს მხრიდან მხარდაჭერა იყო, დარგი  განვითარდა და იმავეს თქმა შემიძლია ღვინის ხარისხის კუთხითაც. 

ღვინის ხარისხი რადიკალურად გაუმჯობესებულია, ასევე გაუმჯობესდა  ქართული  ღვინის ცნობადობა და ზოგადად ეს პროგრამა ქართული ღვინის მსოფლიოში პოპულარიზაციაზე და გაყიდვებზეც დადებითად  აისახა. თუ სახელმწიფო ხედავს, რომ მიზანი მიღწეულია და ჩვენ მზად ვართ, რომ ცალკე ვიყოთ, შეიძლება კარგიც არის, მაგრამ საბოლოო ჯამში კარგია თუ  ცუდი, რთველის  სუბსიდირებიდან გამოსვლა ამას მომავალი დაგვანახებს“, - აღნიშნა ზურაბ რამაზაშვილმა.

გიორგი სამანიშვილი ფიქრობ, რომ პროგრამიდან გამოსვლა კარგი იქნება. თუმცა მისივე თქმით, გამოსვლას წინ უნდა უძღოდეს შემცირება.

„ზოგადად სუბსიდირების წინააღმდეგი არ  ვარ, თუმცა როგორც დღეს სუბსიდირება საქართველოშია ეს მევენახეებს ძალიან დიდ ზიანს აყენებს. წელს სუბსიდირება 2,5 ჯერ გაზარდა. სუბსიდირების პროგრამიდან გამოსვლა სავსებით  შესაძლებელი იყო ადრეც, პირველ წელს შემცირდა, მეორე წელს ფაქტობრივად გაჩერდა, მესამე წელს უკვე შესაძლებელი იყო გამოსვლა. წელსაც 2-3 წლიანი პერსპექტივით შეიძლება გამოსვლა ოღონდ ამ გამოსვლას წინ უნდა უძღოდეს შემცირება და თანდათანობით  გამოსვლა უნდა მოხდეს“, - აღნიშნა გიორგი სამანიშვილმა. 

თაკო კვაჭანტირაძე