თითქმის 4000 ინფიცირების შემთხვევა დღე-ღამეში - ამ ციფრებმა ისრაელის მოსახლეობა, რომელმაც კორონავირუსზე გამარჯვება უკვე იზეიმა შოკში ჩააგდო. შექმნილ ვითარებაში მთავრობა კურსს ცვლის, და ახალი შეზღუდვები შემოაქვს.
პრემიერ-მინისტრ ნაფტალი ბენეტისთვის ბრძოლა კორონავირუსის წინაამღდეგ ისევ აქტუალური თემა გხადა. ეს საკითხი მთავრობის სხდომაზე განიხილებოდა, საერთო აზრია - სიტუაცია ისევ სერიოზულია.
ინფიცირების მაჩვენებლები იზრდება, ტესტების 4% დადებითია, ხოლო დაავადების მძიმე ფორმების რაოდენობა ორმაგდება. და ეს ყველაფერი - სამაგალითოდ ვაქცინირებულ ქვეყანაში, რომელმაც ვირუსის დამარცხების შესახებ უკვე განაცხადა და ყველა შეზღუდვა მოხსნა.
ამჯერად რეგულაციები ისევ ბრუნდება - თუ ადრე მთავრობა ამბობდა, რომ მოსახლეობა ვირუსთან ცხოვრებას უნდა მიეჩვიოს, დღეს პირველ პლანზე ისევ პანდემიის შეკავება გამოდის.
პირბადეების სავალდებულო ტარდება, რომელიც რამდენიმე კვირის წინ დახურული სივრცეებისთის აღდგა, დღეს უკვე ნაწილობრივ ღია სივრცეებზეც ვრცელდება, იმ შემთხვევაში, თუ ღონისძიებას 100-ზე მეტი ადამიანი ესწრება. მასობრივ შეკრებებზე მხოლოდ აცრილი ან გამოჯანმრთელებული მოქალაქეები დაიშვებიან.
საჯარო სამსახურებში თანამშრომელთა ნახევარი ისევ ონლაინ-რეჟიმზე გადადის, მომავალი კვირიდან ისრაელის მოქალაქეები, რომლებიც 40 ქვეყნიდან დაბრუნდებიან, სავალდებულო კარანტინს გაივლიან. ამ ქვეყნებს შორისაა აშშ, გერმანია და ევროპის დიდი ნაწილი.
უცხოელი ტურისტებისთვის ქვეყანა კვლავ დახურული რჩება - საზღვრების გახსნა ჯერ 1 ივნისს იყო დაგეგმილი, შემდეგ 1 ივლისამდე და 1 აგვისტომდე გადაიდო, დღეს კი ამ საკითხზე საერთოდ არავინ ლაპარაკობს.
სამაგიეროდ, ახალი ლოკდაუნის შესაძლებლობა აქტიურად განიხილება. პრემიერ-მინისტრი ბენეტი მუდმივად აცხადებს, რომ ეკონომიკის კიდევ ერთხელ გაჩერება არ სურს, თუმცა, სიტყვა „მაგრამ“ სულ უფრო და უფრო აქტუალური ხდება.
„ჩვენ ვიცით, მუხრუჭებს როდის უნდა დავაჭიროთ“ - განაცხადა მან. უფრო ღიად არასახარბიელო პერსპექტივაზე თავდაცვის მინისტრი ბენი განცი საუბრობს - მისი თქმით, მთავრობამ საზოგადოება სექტემბერში ლოკდაუნის შემოღებისთვის უნდა მოამზადოს. თუმცა, წინა ლოკდაუნების გაკვეთილი ცხადყოფს, რომ თუნდაც ყველაზე მკაცრი კარანტინი - მხოლოდ დროის მოგების შესაძლებლობაა და არა პრობლემის ფუნდამენტალური გადაწყვეტა.
პანდემიასთან საფუძვლიანი ბრძოლის ერთადერთი ეფექტური გზა ვაქცინაციაა. იმის მიუხედავად, რომ მისი ეფექტიანობა რამდენიმე თვეში სუსტდება ისრელის ხელისუფლებამ შესაბამისი დასკვნა გააკეთა - მეტი ადამიანი უნდა აიცრას. 60 წელს გადაცილებული პირებისთვის ვაქცინის მესამე დოზის გაკეთება დაიწყო, მილიონზე მეტ არავაქცინირებულ მოქალაქეზე კი ზეწოლა გაიზარდა. „თქვენ საფრთხეს მთელს ქვეყანას უქმნით და თუ აუცილებელი გახდა ახალი ლოკდაუნის გამოცხადება - ეს თქვენი ბრალი იქნება“ - განაცხადა პრემიერ-მინისტრმა.
www.sueddeutsche.de