პირბადებისა და სადეზინფექციო საშუალებების გაზრდილი ფასებით გაყიდვის საქმის გამოძიების ფარგლებში იტალიის ფინანსური პოლიცია მილანში Amazon და eBay-ის ოფისებში შევიდა. ამის შესახებ ინფორმაციას იტალიური გამოცემა Corriere della Sera ავრცელებს.

გამოცემის ინფორმაციით, გამომძიებლება ოფისებიდან რიგი დოკუმენტები ამოიღეს. მილანის პროკურატურა საქმეს სპეკულატიური ფასების დადგენის ფაქტზე იძიებს.

მოთხოვნის გაზრდის ფონზე ინტერნეტ-მაღაზიებში პირბადებზე და ანტისეპტიკურ საშუალებებზე ფასები მნიშვნელოვნად გაიზარდა. კერძოდ, ერთი პირბადეს ფასი 70 ევროს აღწევდა.

ამ ეტაპზე საქმე აღძრულია უცნობი პირების მიმართ სპეკულატიური მოქმედებებისა და ბაზრის წესების დარღვევის ბრალდებით.

ბოლო მონაცემების თანახმად, იტალიაში კორონავირუსით 12 ადამიანი გარდაიცვალა, 370 კი ინფიცირებულია.

ჯანმომ დღეს განაცხადა, რომ კორონავირუსის პანდემიად გამოცხადების საფუძველი ჯერ არ არსებობს.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს. საქართველოში ვირუსის გავრცელების შანსი მინიმალურია.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.

Imedinews.ge