იტალიის ფინანსურმა პოლიციამ ვლადიმერ პუტინთან დაახლოებულ რუს ოლიგარქს, ვიაჩესლავ მოშე კანტორს სარდინიის კუნძულის ჩრდილო-აღმოსავლეთ სანაპიროზე მდებარე 11 ვილა დაუყადაღა. მათ შორისაა, ქვეყნის ყოფილი პრემიერ მინისტრის, სილვიო ბერლუსკონის დედისა და ძმისგან შეძენელი ქონებაც. ამის შესახებ იტალიური გამოცემა L’Unione Sarda წერს.
გამოცემის თანახმად, ოპერაციის განხორციელებისას სამართალდამცველებს ერთ-ერთი ვილაში უკრაინის მოქალაქეები დახვდნენ, რომლებმაც ქვეყანა რუსეთის შეჭრის შემდეგ დატოვეს. ეს შეიძლება იმით აისხნას, რომ კანტორის მეუღლე უკრაინული წარმოშობისაა.
ევროპის საბჭომ ვიაჩესლავ კანტორის აქტივების კონფისკაციის განკარგულება მიმდინარე წლის აპრილში გასცა, როდესაც ბიზნესმენი ევროპული სანქციების ქვეშ მოექცა. მას შემდეგ კანტორმა გადაწყვიტა თავისი აქტივები გადაეტანა რუსულ „აკრონ ჯგუფში“, რომელიც მსოფლოში მინერალური სასუქის ერთ-ერთი უმსხვილესი მწარმოებელი და დისტრიბუტორია.
გარდა „აკრონის“ მეწილეობისა, კანტორი ევროპულ-ებრაული კონგრესისა და მსოფლიო ჰოლოკოსტის ფორუმის პრეზიდენტია.
2022 წლის მარტში რუს ოლიგარქს სანქციები ბრიტანეთის მთავრობამაც დაუწესა. ამჟამად ის „ფორბსის“ მილიარდერთა რეიტინგში 622-ე ადგილს იკავებს და მისი ქონება 13 მილიარდ დოლარადაა შეფასებული.
ოლიგარქი
