ITB Berlin 2023-ზე საქართველო წელს მასპინძელი ქვეყნის სტატუსით წარსდგა. ბერლინის საერთაშორისო ტურისტული გამოფენის ფარგლებში სტუმრები ქართულ „უსაზღვრო სტუმარმასპინძლობას“, საქართველოს, როგორც ვაზის ქვეყანას, სამზარეულოს, ტრადიციებს, ბუნებასა და არქიტექტურას ეცნობიან.

დღეიდან, 9 მარტის ჩათვლით, გამოფენაზე მოსულ დამთვალიერებლებს ქართულ სტენდზე საქართველოს აეროპორტების გაერთიანების კუთხის ნახვაც შეეძლიათ. ყველა დაინტერესებული პირი საქართველოს საერთაშორისო და ადგილობრივი აეროპორტების შესახებ ყველა საჭირო ინფორმაციას იღებს.

გამოფენის ფარგლებში აეროპორტების გაერთიანების დირექტორი ირაკლი ქარქაშაძე შეხვედრებს მართავს ავიაკომპანიებთან და საავიაციო ინდუსტრიის სხვა წარმომადგენლებთან.

,,საქართველოს აეროპორტების გაერთიანება პირველად მონაწილეობს ITB Berlin-ზე. საშუალება გვეძლევა გერმანიაში მაქსიმალურად წარმოვაჩინოთ მთელი ქვეყანა, კულტურით, ტრადიციებით, ბუნებით და იმ სტუმარ-მასპინძლობით, რითაც თითოეული ჩვენგანი საქართველოში უცხოელ სტუმარს ვხვდებით. პირველი შთაბეჭდილება კი მათ ჩვენს ქვეყანაზე სწორედ აეროპორტიდანვე ექმნებათ. გამოფენის ფარგლებში გვაქვს რამდენიმე შეხვედრა ჩვენთვის პოტენციურად მნიშვნელოვან და სტრატეგიულ ავიაკომპანიებთან და ავიაციასთან დაკავშირებულ სხვადასხვა კომპანიასთან, რომლებიც ITB Berlin-ზე მონაწილეობენ . ფორუმის მასშტაბი ძალიან დიდია, გვეძლევა საშუალება 200 ათასამდე დამთვალიერებელს გავაცნოთ ჩვენი აეროპორტების პოტენციალი. გერმანია ისტორიულად ჩვენი ყველაზე სტრატეგიული მიმართულებაა. ზაფხულის სეზონისთვის გერმანიის 9 ქალაქის მიმართულებით გვექნება პირდაპირი რეგულარული ფრენა, როგორც თბილისის, ისე ქუთაისის საერთაშორისო აეროპორტიდან,-‘’განაცხადა ირაკლი ქარქაშაძემ.

ბერლინში მსოფლიოში ერთ-ერთ უდიდესი ტურისტული გამოფენა ITB Berlin გუშინ გრანდიოზული ქართული კონცერტით გაიხსნა. ქართველმა ხელოვანებმა 3000-მდე სტუმარს საქართველოს უსაზღვრო სტუმარმასპინძლობა და კულტურა გააცნეს.