ამ კანონის მიღებით ვკარგავთ იმ ყველა კარგ, დადებით ბენეფიტს, რომელიც ოდესმე მიგვიღია, - აცხადებს დისტრიბუტორთა ბიზნეს ასოციაციის ხელმძღვანელი ივა ჭყონია, რომელმაც ე.წ აგენტების რუსულ კანონთან დაკავშირებით საკუთარი სამოქალაქო პოზიცია „კომერსანტთან“ დააფიქსირა.
„სამოქალაქო პოზიციის დაფიქსირება მე არასოდეს არ მიჭირს. მით უმეტეს ამ საკითხზე, ჩემი პიროვნული და პირადი მოსაზრებაა, როგორც ამ ქვეყნის მოქალაქის, რომ ზოგადად ამ კანონზე მსჯელობაც კი სამარცხვინოა, არა თუ ის, რომ ეს კანონი მიღებულ იქნეს.
დღეს ჩვენი საკანონმდებლო ხელისუფლება დროს კარგავს ამაში და დროს გვაკარგვინებს იმის მაგივრად, რომ რაც შეიძლება მეტად დავუახლოვდეთ ევროპას.
კარგი, ვთქვათ, ოპოზიციის არავის სჯერა და არ უნდათ მოსმენა და როგორც წარმოაჩენენ ოპოზიცია არის ამ ქვეყნის მტერი, გავიგეთ. ქვეყნის 85%-ს რომ უნდა ევროპული მომავალი, ევროპარლამენტარები, ევროკავშირის ხელმძღვანელობა, აშშ-ს ელჩი და ასე შემდეგ, ესენიც ჩვენი მტრები არიან? რომ გვეუბნებიან, რომ ამ კანონზე მსჯელობაც კი არ შეიძლება?
ცალი ხელით ვსაუბრობთ იმაზე, რომ ევროპასთან გვინდა დაახლოება და მეორეს მხრივ ეს. სამარცხვინოა, უბრალოდ, რაც დღეს ხდება.
ამ კანონის მიღებით ვკარგავთ იმ ყველა კარგ, დადებით ბენეფიტს, რომელიც ოდესმე მიგვიღია. ყველა კარგ პროექტს ვკარგავთ, თუ კი ოდესმე გვქონია ევროკავშირიდან დაფინანსებული. ევროპულ მომავალს ვკარგავთ, ძალიან დიდი ხნით, ჩემი ხედვა ესაა. თუ ეს კანონი მივიღეთ, მაქსიმალურად დავშორდებით ევროპას. ვინმეს თუ რაიმე აინტერესებს, ვინ რითი ფინანსდება, ყველამ ყველაფერი ძალიან კარგად იცის. დამალული და დაფარული არაფერი არაა“, - აცხადებს ჭყონია.
ივა ჭყონია ფიქრობს, რომ ე.წ. აგენტების შესახებ კანონპროექტის „შესაჩერებლად“ სამოქალაქო საზოგადოებას ნაკლები ბერკეტი აქვს.
„ალბათ იმის მეტი, რაც ახლა ხდება ქუჩის აქციებით, რთული იქნება. სხვა არ ვიცი. ოპოზიციას რაც შეუძლია ალბათ იმას აკეთებს პარლამენტში, მეტი უბრალოდ ძალა არ შესწევს, ფიზიკურად პრობლემების წინაშე დადგებიან, მე ასეთი შთაბეჭდილება მრჩება, თორემ უფრო რადიკალიზმზეც წავლენ. ამიტომ საკმაოდ რთული ვითარებაა. ვფიქრობ, რომ ეს იქნება უკან გადადგმული ნაბიჯები ქვეყნის ევროპული მომავლისგან, რისკენაც მთელი ქვეყანა მივისწრაფვით. მით უმეტეს იმ დროს, როდესაც ჩვენთვის პრიორიტეტული უნდა იყოს ევროპული მომავალი, უპრიეტიტულესი უნდა იყოს ახლა, როდესაც მთელი მსოფლიო ერთიანდება რუსეთის აგრესიის წინააღმდეგ, როცა ასეთი მეზობელი გყავს, შოკისმომგვრელია, ჩემთვის როგორც რიგითი ივა ჭყონიასთვის, ეს არის ყოვლად წარმოუდგენელი,“- აცხადებს ივა ჭყონია.