კარტოფილი  საქართველოდან ექსპორტზე გასული ბოსტნეულიდან მოცულობით ნომერ პირველი პროდუქტია - მისმა ექსპორტმა ივნისში $3,7 მლნ შეადგინა, რაც 20%–ით აღემატება ლურჯი მოცვის ექსპორტით მიღებულ შემოსავალს.

ქართული კარტოფილის ექსპორტის ძირითადი მიმართულება რუსეთია - 92%. გარდა ამისა, პროდუქტი ექსპორტზე სომხეთში, ბელარუსში, ყაზახეთში, მოლდოვაში, და თურქეთში გადის.

2021 წლის ივნისში 1 კგ კარტოფილის საშუალო საექსპორტო ფასმა  $0,43 შეადგინა, რაც მაისთან შედარებით 10%-მეტია.

მთლიანობაში კარტოფილის ექსპორტი ივნისში შემცირდა - მაისში ამ მაჩვენებელმა $3,8 მლნ შეადგინა. 2021 წლის 6 თვეში კარტოფილის ექსპორტისგან მიღებული შემოსავალი გასული წლის ანალოგიურ პერიოდთან შედარებით თითქმის 2-ჯერ გაიზარდა და $8,7 მლნ  შეადგინა.

შემოსავლის 85% მაის-ივნისზე მოდის, რაც რუსეთში მოთხოვნის მკვეთრმა ზრდამ გამოიწვია. ქართული კარტოფილისადმი ინტერესის ზრდა რუსეთში ცუდი მოსავლითაა გამოწვეული. თუმცა, იმპორტი იმდენად გაიზარდა, რომ ფასები შემცირდა.

როგორც ჩანს, ქართული კარტოფილისთვის რუსული ფანჯარა უკვე იხურება - ქართველი ფერმერების ინფორმაციით, ბოლო დღეებში რუსი იმპორტიორების მხრიდან შესყიდვები თითქმის შეწყდა.

რუსეთის მხრიდან მოთხოვნის მკვეთრმა ზრდამ  საქართველოშ კარტოფილის გაძვირება გამოიწვია - გასულ წელთან შედარებით შესასყიდი ფასები 5 ცენტით მეტია.

ბოლო 2 თვის მანძილზე ქართული კარტოფილი კარგად იყიდება, თუმცა, მანამდე ვითარება იმდენად მძიმე იყო, რომ მწარმოებლებმა მთავრობას დახმარების თხოვნით მიმართეს.

თუმცა, გასათვალისწინებელია, რომ ეს ფაქტიურად ერთჯერადი შემთხვევაა და გაყიდვების ზრდა არა ფუნდამენტურმა ფაქტორებმა, არამედ რუსეთში მოთხოვნის ზრდამ გამოიწვია. როგორც კი მოთხოვნა რუსეთში შემცირდება - ექსპორტი შეწყდება.

შესაბამისად, გათვლა რუსეთზე, როგორც კარტოფილის იმპორტიორზე, გაუმართლებელია.

.

east-fruit.com