რუსეთიდან მზესუმზირის ზეთის საექსპორტო გადასახადი გასული წლის სექტემბრიდან ამოქმედდა და პერიოდულად იზრდება. ივნისში 1 ტონა პროდუქტის საექსპორტო ბაჟი 152.8 დოლარით გაიზარდა.
შესაბამისად, 1 ტონა ზეთის ღირებულება ამჟამად 525 დოლარს შეადგენს, რომელიც პირველი ივნისიდან შევიდა ძალაში, მანამდე კი საექსპორტო გადასახადი 372 დოლარი იყო.
თუმცა, იმპორტორები უფრო მძიმე და მოსალოდნელ პრობლემაზეც საუბრობენ. არ არის გამორიცხული, რუსეთმა ზეთი საერთოდ აღარ გაყიდოს და ამ შემთხვევაში საქართველოს სხვა ქვეყნის ბაზრის მოძებნა მოუწევს, რომელიც გაცილებით ძვირი იქნება.
კომპანია „ჩირინას” ხელმძღვანელი რევაზ ვაშაკიძე ამბობს, რომ შესაძლოა, რუსეთმა ზეთი საერთოდაც აღარ გაყიდოს და ასეთ შემთხვევაში, საქართველოს სხვა ქვეყნის ბაზრის ათვისება მოუწევს.
,,არის ქვეყნები, რომლებსაც ზეთი უკვე აღარ აქვთ და არც მიღება შეუძლიათ. მაგალითად, მზესუმზირის ზეთის დიდი პრობლემაა თურქეთშიც და არაბეთის ქვეყნებშიც. ეს ყველაფერი რუსეთის პოლიტიკამ გამოიწვია და შეიძლება ჩვენთანაც იგივე მოხდეს. ჩვენმა ჩრდილოელმა მეზობელმა, შესაძლოა, საერთოდ აღარ გაყიდოს პროდუქტი და დიდი ალბათობით, დეფიციტი გაჩნდეს. ამ შემთხვევაში სხვა ქვეყანა უნდა მოვძებნოთ”, - აცხადებს ვაშაკიძე.
ცნობისთვის, საქართველოს ზეთის მთავარი საიმპორტო ბაზარი სწორედ რუსეთია. მიმდინარე წლის იანვარ-აპრილში საქართველომ რუსეთიდან 3.9 მლნ დოლარის ღირებულების 2 504 ტონა მზესუმზირის ზეთი შეიძინა, რაც გასული წლის იმპორტის მაჩვენებლებს მნიშვნელოვნად ჩამორჩება. (2021 წლის იანვარ-აპრილი - 16.8 მლნ დოლარი, 11 831 ტონა). ოკუპანტის ქვეყნის შემდეგ, საქართველო მზესუმზის ზეთს აზერბიჯანიდან (ანალოგიურ პერიოდში 2 მლნ დოლარი, 1 040 ტონა) ყიდულობს, შემდეგ უკრაინა (416.1 ათასი დოლარი, 239 ტონა), იტალია (16 ათასი დოლარი, 5 ტონა) და სომხეთი (6 ათასი დოლარი, 3 ტონა). მცირე მოცულობით ზეთის იმპორტი ამ პერიოდში გერმანიიდან და საფრანგეთიდანაც განხორციელდა.