თბილისში, უნივერსიტეტის ქუჩაზე დეველოპერული პროექტის „შენი სახლი უნივერსიტეტის ქუჩაზე“ განხორციელება მიმდინარეობს. ის მოიცავს როგორც საცხოვრებელ კომპლექსს, ისე კომერციულ ზონას, რომელზეც მოეწყობა სასტუმრო, ოფისები, საგანმანათლებლო და co-working სივრცეები, კვებისა და სავაჭრო ობიექტები, ფიტნეს დარბაზი და სხვადასხვა დანიშნულების ინფრასტრუქტურა.
ეს მასშტაბური პროექტი გამორჩეული იქნება იმით, რომ მის განვითარებაში მონაწილეობას მიიღებენ არა მხოლოდ კომპანიის არქიტექტორები, არამედ ღია კონკურსის წესით შერჩეული სპეციალისტებიც.
„მიუხედავად იმისა, რომ უნივერსიტეტის ქუჩაზე უკვე არის საუნივერსიტეტო კომპლექსი, ახალი სპორტული დარბაზები და სხვა ობიექტები, თბილისის ამ ნაწილში ურბანული სივრცის ორგანიზებას ახლა ეყრება საფუძველი. ამ ტერიტორიის სახე ჩვენ უნდა შევქმნათ და ვაქციოთ ის საზოგადოებრივ ადგილად ისე, რომ ჰქონდეს მნიშვნელოვანი ურბანული ღირებულება და ბუნებრივად იყოს ჩართული ქალაქის ქსოვილში. ამიტომ, გადავწყვიტეთ, ღია კონკურსი გამოგვეცხადებინა და ამ პროცესში მონაწილეობის მიღების შესაძლებლობა მიგვეცა ნებისმიერი არქიტექტორისა თუ ორგანიზაციისთვის. მათი იდეებისა და ახლებური მიდგომების დახმარებით კი, საუკეთესო პროექტი მოგვემზადებინა“, – ამბობს კომპანია „არსის“ აღმასრულებელი დირექტორი, ბესო ორთოიძე.
პროექტისთვის „შენი სახლი უნივერსიტეტის ქუჩაზე“ ღია კონკურსი 12 სექტემბერს გამოცხადდა და 31 ოქტომბერს დასრულდა. მონაწილეებს უნდა წარმოედგინათ საზოგადოებრივი ზონის ურბანული გარემოს პროექტის მომზადებისთვის საუკეთესო იდეები, მიდგომები და წინადადები.
საკონკურსო მასალები 6 არქიტექტორისგან შემდგარმა დამოუკიდებელმა ჟიურიმ განიხილა და 3 საუკეთესო ნამუშევარი გუშინ, 7 ნოემბერს გამოავლინა. მონაწილეთა ვინაობა ჯერ ცნობილი არ არის. ის უცნობია ჟიურისთვისაც, რადგან შეფასების პროცესი ანონიმური წესით წარიმართა. გამარჯვებულები ხვალ, 9 ნოემბერს დასახელდებიან და გადაეცემათ პრიზები. პირველ ადგილზე გასული მონაწილე პრემიის სახით 20 ათას ლარს მიიღებს, მეორე და მესამე ადგილის მფლობელებს კი 15 ათასი და 10 ათასი ლარი გადაეცემათ.
„ამგვარ კონკურსებს უდიდესი მნიშვნელობა აქვს იმისათვის, რომ ქალაქის დაგეგმვის პროცესში გაიზარდოს საზოგადოებისა და სპეციალისტების ჩართულობა და ახალი იდეებისა და მიდგომების დახმარებით, ურბანული გარემოს სწორად განვითარება მოხდეს. სამწუხაროდ, არქიტექტურული კონკურსები ჩვენთან იშვიათად ტარდება, კერძო კომპანიები კი ამის სურვილს, როგორც წესი, საერთოდ არ გამოხატავენ“, – ამბობს არქიტექტორი და ჟიურის თავმჯდომარე, ნიკა შავიშვილი.
ეს პირველი პრეცედენტია, როცა კერძო კომპანია დეველოპერული პროექტისთვის ღია კონკურს აცხადებს და გადაწყვეტილების მიღების პროცესში კომპანია არ მონაწილეობას.
„იმედი გვაქვს, რომ ჩვენი ეს ინიციატივა, სხვა კომპანიებისთვისაც გახდება ბიძგის მიმცემი და ისეთ მნიშვნელოვან პროცესში, როგორიც ქალაქის განვითარებაა, საზოგადოების ჩართულობაც გაიზრდება.
ჩვენ გვჯერა, რომ პროექტი „შენი სახლი უნივერსიტეტის ქუჩაზე“ კონკურსანტების ნამუშევრების დახმარებით ბევრად საინტერესო გახდება. საბოლოოდ კი, ეს ადგილი როგორც ჩვენი კომპლექსის მაცხოვრებლებისთვის, ასევე სტუმრებისთვის ერთ-ერთ მიმზიდველ და განსხვავებულ ადგილად იქცევა “, – ამბობს ბესო ორთოიძე.
აღსანიშნავია, რომ კომპანიას უკვე განხორციელებული აქვს ისეთი წარმატებული პროექტები, როგორებიცაა „შენი სახლი ჯიქიაზე“, „შენი სახლი კიკვიძის ბაღთან“, „შენი სახლი სამგორში“ და „შენი სახლი ლისზე“. „შენი სახლი უნივერსიტეტის ქუჩაზე“ მისი რიგით მე-5 პროექტია, რომლის ფარგლებშიც 17 საცხოვრებელი სახლი და 3-4 სართულიანი კომერციული შენობები აშენდება.
(R)