უოლ სტრიტის ორი საინვესტიციო ბანკი, JPMorgan Chase & Co და Goldman Sachs Group რუსეთის სუვერენულ და კორპორაციულ ვალებზე გარიგებების დამუშავებაზე უარს ამბობენ. ინფორმაციას Bloomberg-ი ბანკების ამ გადაწყვეტილებას წყაროზე დაყრდნობით ავრცელებს.
6 ივნისს ფინანსთა დეპარტამენტის მიერ რუსეთის წინააღმდეგ გამოცხადებული ახალი ფინანსური სანქციების მიხედვით, ამერიკელ ინვესტორებს რუსეთის მიმდინარე და ახალი ვალების შესყიდვა აეკრძალათ. ამ გადაწყვეტილებამდე, ივნისის დასაწყისში, სააგენტოს ფინანსური ბაზრის წყაროების ცნობით, JPMorgan Chase და Goldman Sachs როგორც გამყიდველებთან, რომლებსაც სურდათ რუსეთის სავალო აქტივებიდან გასვლა, ასევე, რუსული ვალის დაინტერესებულ მყიდველებთან გარიგებების მომსახურებას განაგრძობდნენ. JPMorgan ამგვარი ტრანზაქციების დამუშავებას მას შემდეგ შეწყვეტს, რაც აშშ-ის ხაზინის საგარეო აქტივების კონტროლის ოფისმა (OFAC) ამერიკელ ინვესტორებს რუსული ვალის შეძენის უფლება ჩამოართვა.
Goldman-ის წარმომადგენელი აცხადებს, რომ მსგავს ტრანზაქციებს ეს ბანკიც შეწყვეტს. Goldman Sachs-ის განცხადებაში ნათქვამია, რომ ბანკი რუსეთთან დაკავშირებულ საქმიანობას „OFAC-ის განახლებული მითითებების შესაბამისად“ წყვეტს და რუსეთის სახელმწიფო და კორპორატიულ ფასიან ქაღალდებზე „გარკვეულ ტრანზაქციებს აღარ განახორციელებს.“
ადრე თეთრი სახლი ფასიანი ქაღალდებით მოვაჭრეებს, მათ შორის Goldman Sachs-სა და JPMorgan-ს საშუალებას აძლევდა, კლიენტებს მეორად ბაზარზე რუსული ვალის შესყიდვაში დახმარებოდნენ, რადგან ობლიგაციების ბევრი მფლობელი აქტივების გადმოტვირთვას ჩქარობდა. თუმცა პოლიტიკის განახლების შედეგად აშშ-ის ბაზრის მონაწილეებს რუსეთის ფედერაციაში გამოშვებული როგორც ახალი, ისე არსებული სავალო და წილობრივი ფასიანი ქაღალდების შეძენა აეკრძალათ. ამერიკელ ინვესტორებს რუსული ფასიანი ქაღალდების გაყიდვა ან ფლობა კვლავ შეუძლიათ, თუმცა მათ ვეღარ იყიდიან.
მაისის ბოლოს აშშ-ის ხაზინამ აღარ განაახლა გენერალური ლიცენზია, 9C , რომელიც რუსეთს თავისი საგარეო ვალის მომსხურების საშუალებას აძლევდა. Bloomberg მაშინ წერდა, რომ ეს რუსეთს დეფოლტამდე მიიყვანდა, თუმცა მისი თავიდან აცილების გზებიც არსებობს. 1917 წლის რევოლუციის შემდეგ რუსეთს საგარეო ვალის დეფოლტი არ დადგომია.