თბილისში, 2019 წლამდე გაცემულ ნებართვებზე, კომპანიებისთვის K2-ის მოსაკრებლის გადახდის გადანაწილება მოხდება.
საკითხზე „ბიზნესპრესნიუსთან“ სამართლის დოქტორმა და სამშენებლო სამართლის ლექტორმა უჩა ზაქაშვილმა ისაუბრა. მისი თქმით, თავისთავად აქტი პოზიტიურია, თუმცა დედაქალაქის მთავრობის მხრიდან სამშენებლო სფეროს ღრმა კრიზისის აღიარებას ნიშნავს.
,,თავის დროზე, დაშვებული იყო სამშენებლო პარამეტრების გადამეტება, რაც ბოლო წლებში, კალაძის მერობის პერიოდში შეიცვალა და კანონი გამკაცრდა. K2-ის გადაჭარბება დაშვებული გახდა მხოლოდ განსაკუთრებულ შემთხვევებში. თავისთავად k2-ი ნიშნავს, რომ შეგვიძლია მეტი სართული ააშენოს, მეტი სივრცე გაანაშენიანოს მშენებელმა. შემთხვევებზე კი, რომლებიც ფასიანია ხდება დედლაინის მიხედვით თანხის გადანაწილება, დაახლოებით სესხის გრაფიკის მსგავსსია. თუმცა, სამშენებლო ობიექტების დიდი ნაწილი სხვადასხვა მიზეზით არ იხდიდა ამ თანხებს. პრობლემა შეიძლება იყოს, რომ თავის დროზე გამონაკლისები დაიშვა გარკვეული ბიზნეს სუბიექტებისთვის და ახლა ერთგვარი სამართლიანი ბალანსის აღსადგენად იძულებული გახდნენ ახალი ნორმა შეემუშავებინათ. თავისთავად გადავადებაში ცუდს ვერაფერს ვხედავ, მით უფრო იმ ფონზე, როცა სექტორისთვის მილიონი ამნისტიაა მიღებული, რაც დანაშაულს და უკანონობას ახალისებს. ამ ფონზე, არავითარ ძირეულ ცვლილებას ეს არ გამოიწვევს.
დადებითი ეფექტი კი, ბიზნესისთვის იქნება, რადგან თანხის გადანაწილებას შეძლებენ. ეს მნიშვნელოვანია მით უფრო ახლა, როცა სამშენებლო ბაზარი ისედაც ძალიან დამძიმდა სამშენებლო მასალების გაძვირებიდან გამომდინარე. ბაზრის გაძვირება არ მოხდა მოთხოვნის ზრდის გამო, უბრალოდ, თვითღირებულება გაიზარდა. ახლა, შეიძლება უცხოელი მოქალაქეების შემოსვლამ დააბალანსოს მოთხოვნა, მაგრამ კრიზისი რომ არსებობს, ეს მოცემულობა ვერ შეიცვლება. მერიის მხრიდანაც ეს შეღავათი ნიშნავს აღიარებას, რომ სამშენებლო სექტორი მძიმე კრიზისშია“, - განაცხადა ზაქაშვილმა ,,ბიზნესპრესნიუსთან“.
შეგახსენებთ, თბილისის მერია სამშენებლო კომპანიებს K-2 კოეფიციენტის მოსაკრებლის გადახდას ეტაპობრივად შესთავაზებს. საუბარია 2019 წლამდე გაცემულ ნებართვებზე. კახა კალაძემ განაცხადა, რომ შესაბამისი საკანონმდებლო ინიციატივა უკვე მომზადებულია. მისივე განცხადებით, ეს გადაწყვეტილება დარგის წარმომადგენლებთან შეხვედრების შემდეგ იმისთვის იქნა მიღებული, რომ დედაქალაქში დაუმთავრებელი მშენებლობები კვლავ არ გაჩნდეს.