გერმანია უკრაინას მის პორტებში რუსეთის მიერ დაბლოკილი მარცვლეულის ექსპორტში დაეხმარება. ამის შესახებ გერმანიის სოფლის მეურნეობის მინისტრ ჯემ ოზდემირმა განაცხადა, რასაც გამოცემა Bild ავრცელებს.
ოზდემირის თქმით, ის თავის კოლეგებთან ერთად მაისის შუა რიცხვებში დაგეგმილ G7-ის სოფლის მეურნეობის მინისტრების სამიტზე განიხილავს, თუ როგორ შეიძლება, უკრაინას მსოფლიო ბაზრებზე წვდომა ჰქონდეს გარანტირებული. მინისტრის აზრით, ალტერნატიული სატრანსპორტო მარშრუტები უნდა შეიქმნას.
„მიუხედავად იმისა, რომ სარკინიგზო მარშრუტი დიდ ძალისხმევას მოითხოვს და შეზღუდული გამტარუნარიანობის არის, ეს შესაძლოა, უკრაინული მარცვლეულის ექსპორტისთვის გამოსავალი გახდეს და როგორც ფედერალური მთავრობა, ჩვენ ამისთვის ყველაფერს გავაკეთებთ,“ - აცხადებს ჯემ ოზდემირი.
ის განმარტავს, რომ სხვა საკითხებთან ერთად, სარკინიგზო ტრანსპორტის სირთულეს უკრაინასა და ევროკავშირში ლიანდაგის განსხვავებული სიგანეც იწვევს. გარდა ამისა, რუსეთი უკრაინაში სარკინიგზო კვანძებსაც ბომბავს.
მინისტრის თქმით, გერმანიის მთავრობას უკრაინის მარცვლეულის ელევატორებზე, სასუქების საწყობებზე, სასოფლო-სამეურნეო მიწებსა და ინფრასტრუქტურაზე რუსეთის მიერ მიზანმიმართული თავდასხმების შესახებ ცნობები განუწყვეტლივ მისდის. ოზდემირი მიიჩნევს, რომ პუტინის მცდელობა არის „გრძელვადიან პერსპექტივაში უკრაინა, როგორც კონკურენტი აღმოფხვრას.“
ამასთან, მსოფლიოში მზარდი შიმშილის ფონზე რუსეთი ზეწოლის გაძლიერებას ცდილობს. მინისტრის ვარაუდით, „საბაზრო ფასების მასშტაბური ზრდა რუსეთს ხელს აძლევს, რადგან ეს ამ ქვეყანას ახალ ფულს მოუტანს.“
გაეროს მსოფლიო სასურსათო პროგრამის თანახმად, უკრაინის პორტებსა და გემებზე ამჟამად, დაახლოებით, 4,5 მილიონი ტონა მარცვლეული არის ჩარჩენილი. ამ პირობებში უკრაინის საგარეო საქმეთა სამინისტრომ მსოფლიო საზოგადოებას შეახსენა, რომ რუსეთის მიერ უკრაინის წინააღმდეგ დაწყებული ომი და შავი ზღვის პორტების ბლოკირება მრავალ ქვეყანას სასურსათო კრიზისის საფრთხეს უქმნის.
მარცვლეული
