ჩეჩნეთის რესპუბლიკის მეთაურმა, რამზან კადიროვმა განაცხადა, რომ ლიმანიდან რუსული ჯარების უკან დახევაზე პასუხისმგებელი ცენტრალური სამხედრო ოლქის მეთაური, გენერალ-პოლკოვნიკი ალექსანდრე ლაპინია.

„ამ მონაკვეთის დაცვას ხელმძღვანელობდა ცენტრალური სამხედრო ოლქის მეთაური, გენერალ-პოლკოვნიკი ალექსანდრე ლაპინი. ეს ის ლაპინია, რომელმაც მიიღო რუსეთის გმირის ვარსკვლავი ლისიჩანსკის აღებისთვის, თუმც კი რეალურად ის იქ არ ყოფილა“, - წერს კადიროვი ტელეგრამზე.

ჩეჩნეთის მეთაურის თქმით, ლაპინმა ლიმანში სამხედროებს დროეულად არ მიაწოდა საბრძოლო მასალები და არც საჭირო საკომუნიკაციო საშუალებები.

კადიროვი ირწმუნება, რომ იგი გააფრთხილეს ფრონტის ამ სექტორში შესაძლო წარუმატებლობის შესახებ და ამის შესახებ ის ესაუბრა კიდეც რუსეთის გენერალური შტაბის უფროსს, ვალერი გერასიმოვს.

„მაგრამ გენერალმა დამარწმუნა, რომ მას არ ეპარებოდა ეჭვი ლაპინის ლიდერობის ნიჭში“, - თქვა კადიროვმა, რომლის განცხადებით, ერთი კვირის შემდეგ, ლაპინმა თავისი შტაბი გადაიტანა სტარობელსკში, რომელიც მდებარეობს ლიმანიდან ას კილომეტრში, ხოლო თავად გენერალ-პოლკოვნიკი იმყოფებოდა ლუგანსკში.

„სირცხვილი ლაპინი კი არ არის, არამედ ის, რომ მას ზევით აფარებენ გენერალური შტაბის ლიდერები. ჩემი ნება რომ იყოს, მას რიგითობამდე ჩამოვაქვეიტებდი, ჩამოვართმევდი ჯილდოებს და ავტომატით ხელში, ფრონტის ხაზზე გავგზავნიდი, რომ სირცხვილი სისხლით ჩამოერეცხა“, - წერს კადიროვი.

ჩეჩნეთის მეთაურის თქმით, სასაზღვრო ზონებში უნდა გამოცხადდეს საომარი მდგომარეობა და რუსეთმა გამოიყენოს „დაბალი სიმძლავრის ბირთვული იარაღი“.

მაისის დასაწყისში BBC-ის რუსულმა სამსახურმა გაავრცელა ინფორმაცია, რომ გენერალმა ლაპინმა დააჯილდოვა თავისი ვაჟი, ლეიტენანტი პოლკოვნიკი დენის ლაპინი, რომელიც მეთაურობს 1-ლი გვარდიის სატანკო პოლკს და ხელმძღვანელობდა წარუმატებელ შეტევას სუმისა და ჩერნიგოვის წინააღმდეგ.

იმ დღეს, როდესაც ტელეკომპანია ზვეზდამ გაავრცელა სიუჟეტი ამ დაჯილდოვების შესახებ, რუსული არმია უკან იხევდა ჩერნიგოვისა და კიევის მიმართულებიდან.

წყარო: radiotavisupleba.ge