„კადრების დეფიციტის თვალსაზრისით ჩვენთან კატასტროფული ვითარებაა, კადრების შენარჩუნება ძალიან გვიჭირს“  - ამის შესახებ რადიო „კომერსანტის“ გადაცემაში „კომერსანტის დილა“ საქართველოს დისტრიბუტორთა ბიზნეს ასოციაციის პრეზიდენტმა ივა ჭყონიამ ისაუბრა.

მისი თქმით, პანდემიის პირველი ტალღის შემდეგ, როდესაც მიტანის სერვისი პოპულარული გახდა დისტრიბუციის სექტორში კადრების დეფიციტი შეიქმნა.

„ჩვენი მუშა ხელის ძალიან დიდი რაოდენობა „გლოვოში“ სამუშაოდ  გადავიდა. იმიტომ რომ ფაქტობრივად იგივე ანაზღაურებაზე, რიგ  შემთხვევაში შესაძლოა მეტსაც, მუშაობდნენ ისე, რომ თავის თავის უფროსები თვითონ იყვნენ და როდესაც მოუნდებოდათ ისვენებდნენ და როდესაც მოუნდებოდათ მუშაობდნენ. შედარებით უფრო მოქნილი და თავისუფალი გრაფიკი ჰქონდათ.

რაც შეეხება ჩვენ სექტორში კადრების გადინებას, ეს ერთის მხრივ მიტანის სერვისში გადასვლა, ხოლო მეორეს მხრივ საზღვარგარეთ სამუშაოდ წასვლით არის გამოწვეული. სადაც ხელფასები არც თუ ისე დაბალია. თავისთავად ცხადია, რომ როდესაც ინფლაციის მაჩვენებელი ქვეყანაში მაღალია ხელფასების მატებაც უნდა ხდებოდეს. ჩვენ სფეროში ხელფასები 1000 ლარიდან  1500 ლარის ფარგლებში მერყეობს, თუმცა ყველა სამუშაოს სჭირდება ადაპტაცია. შესაბამისად საწყის ეტაპზე კომპანიები 700-დან 1000 ლარამდე ანაზღაურებას სთავაზობენ დასაქმებულებს, რაც გარკვეულ წყენას იწვევს. არაერთხელ გვქონია შემთხვევა, რომ უთხოვიათ ჩვენთან მუშაობა, თუმცა რამდენიმე დღეში აღმოუჩენიათ, რომ ფიზიკურად ვერ იმუშავებენ“, - აღნიშნა ივა ჭყონიამ.

ჭყონიას თქმით, დღევანდელ ვითარებაში, როდესაც ტრაფიკი ძალიან არის გაზრდილი, დისტრიბუტორებს ბევრი მუშაობა უწევთ. რაც გულისხმობს  შეკვეთის აღებას, ადგილზე მიტანას და განთავსებას, რაც  არც თუ ისე მარტივი საქმეა. კითხვაზე თუ როგორ ცდილობს სექტორი კადრების შენარჩუნებას ჭყონია ამბობს, რომ დღეს როდესაც კადრების გადინებაზე ვსაუბრობთ ზოგ შემთხვევაში ეს ხელფასს არ უკავშირდება და მოსახლეობაში უიმედობის და პესიმიზმის განცდაა და სწორედ ამიტომ იღებს გადაწყვეტილებას ქვეყნიდან წასვლაზე. მისივე თქმით, პრობლემაა სოციალურად დაუცველი ადამიანების კუთხითაც. ჭყონია აღნიშნავს, რომ სახელმწიფომ უნდა მოახერხოს და ეს ადამიანები კერძო სექტორში ჩართოს, რადგან ეს სამუშაო ძალა დრეს ბიზნესს სჭირდება.

„კატასტროფული მდგომარეობაა სოციალურად  დაუცველი ადამიანების მიმართულებით, დღეს ქვეყანაში დაახლოებით 380 000 სოციალურად  დაუცველია, სახელმწიფომ დაიწყო  ძალიან კარგი პროგრამა და სოციალურად დაუცველებს აძლევს იმის საშუალებას, რომ თან იმუშაონ და არ შეუწყდეთ  დახმარება, მაგრამ ამას მოსდევს ის მინუსი, რომ სოციალურად დაუცველებს თავიანთ სსიპ-ებში ამუშავებენ. რაც ნიშნავს იმას, რომ სახელმწიფო მათ უხდის სოციალურ დახმარებას და ასევე  ბიზნესის მიერ გადახდილი გადასახადებიდან აძლევს ხელფასსაც. საუბარია 10 000 - ობით ადამიანზე, ამ კუთხით სახელმწიფო  ბიზნესთან ერთად  აქტიურად  უნდა ჩაერთოს და რაც შეიძლება მეტი სოციალურად დაუცველი ადამიანი უნდა აიძულოს, რომ იმუშაოს. ამას თუ სახელმწიფომ  ვერ მიხედა ჩვენ ბიზნესი ვერაფერს ვერ  გავაკეთებთ, რეალურად ეს კადრები საჭიროა“, - აღნიშნა ივა  ჭყონიამ.

ჭყონიას  თქმით, საქართველოს დისტრიბუტორთა ასოციაცია, სამუშაოს  მაძიებლებს 2-3 თვიან უფასო სასწავლო პროგრამას  სთავაზობს, რომლის  წარმატებით დასრულების შემთხვევაში კურსის მსმენელს დასაქმების  100% -იან  გარანტიას აძლევს. მან ასევე  აღნიშნა, რომ ბოლო კურსი მხოლოდ 7-მა ადამიანმა დაასრულა რაც ძალიან გულდასაწყვეტია.

„სწავლება მიდის ონლაინ და ჩვენ შეგვიძლია ეს ადამიანები, როგორც თბილისში ასევე რეგიონებშიც დავასაქმოთ, ტრაფიკებიდან გამომდინარე სექტორი სერიოზული პრობლემის  წინაშე ვდგავართ. ეს სიტუაცია წინასაახალწლო პერიოდში კიდევ უფრო გართულდება“, - აღნიშნა ივა ჭყონიამ.