კაფე-სანაყინეების ქსელი „ლუკა პოლარე“ ფართოვდება. ფერად-ფერადი ნაყინის ბურთულებით ცნობილმა  ბრენდმა ახალი ფილიალი ბაგებში გახსნა, რომელიც ქვეყნის მასშტაბით 21-ე იქნება, ხოლო თბილისში რიგით მე–14 ფილიალია.

როგორც ,,ლუკა პოლარეს“ საზოგადოებასთან ურთიერთობისა და მარკეტინგის ხელმძღვანელი ანი ციცქიშვილი ,,კომერსანტთან“ აღნიშნავს, წლევანდელ სეზონზე კომპანია 3 ახალ ფილიალს გახსნის, ხოლო ერთი ძველი ფილიალი განახლდა და მთლიანად შეიცვალა კონცეფცია.

,,კომპანია უწყვეტად ვითარდება. მაღალი მოთხოვნიდან გამომდინარე, წლიდან წლამდე ვფართოვდებით. წლევანდელ სეზონზე ჯამში 3 ახალი ფილიალი გვექნება. ერთი ბაგებში, რომელიც დღეს იხსნება, სრული ფორმატის ფილიალია. ადგილზე  5 ადამიანი დასაქმდება. ახალი ფილიალი გულისხმობს დამატებით ახალ კადრებს  დისტრიბუციასა და წარმოებაში. ჯამში 200-მდე დასაქმებულია და მათი რაოდენობა სეზონის განმავლობაში იზრდება“, - ამბობს ანი ნაცვლიშვილი.

ქსელის გაფართოებისთვის 100 000 ლარის ინვესტიცია განხორციელდა.

,,კომერსანტთან“ საუბრისას  ანი ნაცვლიშვილმა დააანონსა, რომ სამშაბათს მთაწმინდაზე, ჭონქაძის ქუჩაზე  ,,ლუკა პოლარეს“ 22-ე ფილიალი გაიხსნება, რომელიც ასევე  განსხვავებული კონცეფციით იქნება გამორჩეული.

მისივე თქმით, ახალი ლოკაცია არ არის, მაგრამ მთლიანად შეიცვალა სანდრო ეულის ქუჩაზე მდებარე ფილიალის ინტერიერი და კონცეფცია, რომლის პრეზენტაცია 1–ელ ივნისს მოეწყო.

ცნობისთვის, პოლარული დათვი — ,,ლუკა პოლარე“ კაფე-სანაყინეების ქსელია, რომელიც მომხმარებელს სხვადასხვა სახეობის ნაყინს და ექსკლუზიურ ყავას სთავაზობს. საქართველოს მასშტაბით იგი 4 ქალაქშია წარმოდგენილი: თბილისში უკვე 14 ფილიალით, ბათუმში - 4 და ქობულეთში - 1, რუსთავში - 1 და ქუთაისში 1.

პირველი მაღაზია  ,,ლუკა პოლარეს“  ბრენდით ლესელიძის ქუჩაზე 2008 წელს გაიხსნა.

რაც შეეხება პროდუქტის ფასებს, სტანდარტული ნაყინი ფასი 3,90 ლარია, პრემიუმ  ნაყინი 5,50 ლარად იყიდება. 

გარდა ნაყინისა, წარმოდგენილია ყავა და სხვადასხვა დასახელების ტკბილეული.

მარი ჩიტაია